Hoogheemraadschap Rijnland OAR 11, 12, 13 : 1253 - 1564
	View: Register OAR 12 Pages 070 - 079

 

Go to Folio's ...
000	010	020	030	040	050	061	070	080	090	100	110	120	130

 

Location, Folio
OAR12, 070v-a
type : Vonnis	date : 1448-02-27	record : # 292
[025] Item upten xxvii ten dach van februario des woensdages na sinte Pieters dach ad cathedram inden jare ons heren duysent vierhondert zeven ende veertich naden loop shoofs van Hollant [i.e., 1448] ist geschiet dat Bouwijn van Zwieten bij hem ontboden heeft heer Bouddijn confessoir up desen tijt tsinte Marien poel [Oegstgeest] ende Dirck Bouwijns z. van Zwieten sijnen neve, welke Dirck Bouwijns z. na dier tijt gecomen is tot heer Gerijt van Poelgeest hem een bootscap doende van Boudwijns voirs. wegen seggen hoe dat Bouwijn sijn oom heren Gerijts voirs. hadt dair te willen thoeven ende de onder sijn mede gesellen hoge hiemrade van Rijnlant die thans jegenwoirdich waren te willen spreken ende die dair niet en waren te willen ontbieden om zekere saken die Boudwijn sijnen oom voirs. mitten voirs. hiemrade sijn mede gesellen te spreken hadde, soe ist geschiet dat de voers. heer Gerijt dese saken heer Willem van Alcmade ende Simon Vrederic sijn mede gesellen die up die tijt te Leyden waren te kennen gegeven heeft die welke samentlike mit hem sloten dat sij den andere hoir mede gesellen samentlike verdachvairden den eersten dach van mairte te Leyden te wesen, die welke tot dier tijt dair alle vergadert sijn geweest of hair machte dair gesent wtgesceyden een ende sijn samentlike gegaen tot Boudewijn van Zwieten voirn. an te hoiren wes sijn [67r] begeren was ende bij Boudewijn voirs. also gecomen heeft die voirs. Boudewijn hem te kennen gegeven also als hij hoir mede gesell inden voirs. hiemraetscip van Rijnlant lange tijt geweest hadde dair grote laste, arbeit, ende sorge voir de gemene landt in stont, het welke hij seyde soe hij hem thans bevoelde niet langer bewaren [gewaren?] noch regeren en mochte tot oirbair sijnen live noch tot salicheyt sijne ziele, dair hem op gevraget wort Bouwijn 'Hoe moech dij u thans dus bevoelen ghij hebt doch corteliken mit ons upte scouwe tot Sparendam geweest aldair wij ons lieten duncken dat ghij in redeliken schijn wairt.' Dair die voirs. Boudewijn weder op antwoirdt seggende 'Lieve vriende, wat wil ic u veel seggen. Tis wair dat ic mede up de scouwe geweest hebbe dan hoe nu dat becomen is dat weet ic wel. Ic bevoele nu also dat ic nut noch oirbair dair meer toe en ben, ende neme dat bijden eet die ic mijnen genadigen heer ende de land van Rijnlant gedaen hebbe. Dair ic bidde u om goidswillen dat ghij aensiet mijnen staet ende mi niet en vergheet tghene dat in mijnre moge niet en is te doen, ende ic sette ende resignere mijnen dienst in uwen handen ende betrouwe dat uwer wijsheit dat ghij wel in mine stede kiesen sult dair tlant van Rijnlant wel mede bewairt sal wesen.' Ende als de voirs. hiemrade Boudewijns voirs. entelike menijnge aldus verstaen hebben, soe sijn sij samentlike bij een gegaen ende hem doechdeliken hier op bedocht ende beraden, ende na dat sij bevonden in hoiren rechten ende van outs costumeliken is geweest, so hebben sij samentlick ende eendrachtelic als voirs. eenen anderen hiemraet gecoren, ende was Jan van Poelgeest, op desen tijn scout tot Leyden.

 

Location, Folio
OAR12, 071v-a-072r
type : Vonnis	date : 1450-06-30	record : # 495
[026] Also zeker gesceel staet tusschen die van Poelien, Groensfoort ende Snidewijck als ansprekers ende van Alphen ende Boschcoop als verweerres roerende van eenre wateringe geheten Polienre wateringe die sint den oirloge vander Goude ongemaect ende onbescouwet gelegen heeft ende voirtijts bij beiden partien gemaect ende gescouwet wort, ende die voirn. cleine dorpen dingen ende begeren noch die voirsc. wateringe na ouden custumen gemaect ende gescouwet te hebn, dair hen die van Alfen op verweren ende seggen dat sij sculdich sijn na wtwisinge hoirre hantvesten alle vreemde wateren wt hore waterscap te keren ende seggen dat sulc water als die voirn. dorpen brengen willen in hoir waterscap vreemde water is wanttet nie dair in gewatert en heeft. Dair die voirn. smael dorpen tegen dingen ende seggen dat hoir water dat sij wtbrengen willen geen vreemt water en is bij reden want die hantvest dair hem die van Alphen mede verweren ende die voirn. smael dorpen wt hoirre waterscip mede keren willen als voir vreemt water so wel den smalen dorpen toebehoirt als die van Alfen ende van Boschcoop voirt seggen die smael dorpen voirsc. al waert dat sij tot deser wateringe geen recht en hadden so en sal mogelijc geen lant ellendich ende ongewatert bliven binnen den merken van Rijnlant men en is sculdich alle die geen dies behoeven na horen versoeke enen waterganc te wijsen ter meester oirbaer in dien sij mitten lande gelden willen als dese voirn. smael dorpen gaern doen willen mit veel ['woirden' is crossed out] ander woirden die sij an beiden siden in gescrifte over gegeven hebn. So is der heemr. bevoelen ende wisen voir recht na onser bester wetenheit dat die voirn. smael dorpen hebben ende gebruken sullen sulken waterganc als van outs geweest heeft ende sij om gedinget hebben in dien dat den voirn. dorpen mit die wateringe gebaet is ende sullen die maken, scouwen ende houden op horen coste sonder die van Alfen ende van Boschcoop enichrade enichrande moeynisse te doen roerende van dier wateringe, ende die voirn. smael dorpen sullen dair in mogen brengen mede wt te wateren sulc lant als bij horen versoeke die heemr. van Rijnlant besien hebben ende bij Pieter van Bosch horen gesworen bode ende bij Ghijstgen des lants gesworen meter hebn doen meten ende is groot omtrent honderd ende tseventich mergen behoudelic dat die voirsc. dorpen sullen laten leggen tusschen den [72r] opperen veen ende heen een kade x roeden breet om die wateren vanden opperen veenen van hem te keren, van welken nuwen bewaterden lande sij altijt gelden sullen mergen mergen gelijc, ende hier mede geven wij den smalen dorpen die kenninge gewonnen ende die van Alphen ende van Boschcoop verloren.

 

Location, Folio
OAR12, 072r-a
type : Vonnis	date : 1451-03-05	record : # 496
[027] Wij Jan van Noorde ende Jan Heinric Paedzen z. scepene in Leiden oirconden dat voir ons quam Adriaen vander Mye ende beliede dat hi vercoft heeft ten hogen heemraet van Rijnlant tot slands van Rijnlant behoeff ende tot alle ten lande behoeff die binnen der merken van Sparendam gelegen sijn ses morgen lants gelegen inden ambocht van Alphen ende heeft an die oestsijde Aernt Jan Goden soon erfnamen ende Dirc Willem Danels z. aen die westzijde heer Gerijt Symons z. priester mit capelrie lant daer die van Raephorst Gevers off zijn streckende voir uten Rijn after an die wateringe. Ende Adriaen vander Mye voirscr. ende Jan Heerman loveden mit gesamender hant ende elcx voir alle den hogen heemraet van Rijnlant tot des voirsc. lants behoeff dese ['n' is crossed out] voirsc. ses morgen lands vry te waren jaer ende dach also recht is ende alsmen vrij lande ende eygen erve sculdich is te waren. Voirt soe lovede Adriaen voirsc. Jan Heerman voirn. hier off scadeloos te houden ende hier off beliede hem Adriaen voirn. wel voldaen ende betaelt den lesten penninc mitten eersten. In oirkonden desen brieve bezegelt mit onsen zegelen, int jair ons heren dysent vierhondert een ende vijftich upten vijften dach in maerte.

 

Location, Folio
OAR12, 072r-b; OAR12, 085r-a
type : Vonnis	date : 1444-02-24	record : # 179
[028] [047] Petri ad cathedram xliiii anno xliiii. Item so hebben op dese scouwe geweest heer Gerijt van Poelgeest, heer Willem van Alcmade, Jan vander Boechorst, Boudijn van Zwieten, Florijs Paedze ende IJsbrant van Scoten. Item inden eersten hebben die voirs. heemr. in yegenwoirdicheit die dijcgrave bevolen allen ambocht bewairres van Rijnlant [50r] dat elc hoir penninc gelt den heemr. toe behorende omslaen ende in gaderen also dat rede wair, twisken dit ende meyen dage naestcomende, des doe die ambocht bewarers dingeden anden dijcgrave ofter yemant wair die onwillich wair sijn pennincgelt te betalen hoe si dat voirt souden in gecrigen, also dat die dijcgrave des vonnes vragede, des him gewijst wort dat die dijcgrave dat sculdich waer voir den onwilligen wt te leggen ende naden ouden rechten ende costumen dat weder in winnen, twee scatte an gelde of vier scatte an pande, des die dijcgrave vorder vonnes vragede of hi sijn gelt wt leyde binnen wat dage hi dat weder in sinnen soude, des him die gewijst wort binnen viertien dage.

 

Location, Folio
OAR12, 072v-a-073r
type : Vonnis	date : 1448-06-25	record : # 303
[029] Anno xlviii op sinte Jans scouwe waren vergadert tot Leyden Poelgeest, Alcmade, Zijl, Poelgeest, Schoten ende Simon Vrederick Also Vechter Claes zoon als ambocht bewairre van Zoeterwoude de burgermeesteren van Leyden toe gesproken ende tmorgengelt van vijftich morgen lants gheeyscht heeft mits dien dat die bijden vesten vander stede, ende dair binnen getogen sij bij vermeeren vander voirs. stede so dat dat ambocht van Zoeterwoude langer dan in vijftich jaren dair geen morgen gelt of en hebben connen crigen, etc., daer die burgermeester weder op geantwoirt hebben seggende dat hun vervreemt onder ander woirden van de voirs. Bechters beclachten aen gesien so hij zelve bekent dat die stede van Leyden nie in vijftich jaren of meer dair enigch morgen gelt of gegeven en hebben, seggende voirt bij die reden also de voirs. stede langer dan een derdendeel van hondert jaren van den voirs. vijftich morgen in een rustelic besit geweest heeft datsij dair omme vrij souden wesen van de voirs. Vechters aensprake, mit veel meer ander redenen in hoirren antwoirden begrepen, etc., dair de voirs. Vechter weder op gerepliceert heeft ende geseyt sonderlinge in enen punte van sijnen repliken dat hij bewijsen soude ter kennesse vanden hogen hiemrade dat de stede mit ghenen reden mit den voirs. besit behelpen en soude mogen, etc., up welken punte die voirs. burgermeestern gedupliciert hebben sterkende hoir antwoirde ende bliven gijden voirs. besitte mit veel woirden dair inne gelegen, etc., welke voirs. zaken de voirs. hiemrade wel doir gehoirt ende doir gesien hebben, aensprake, antwoirde, replike ende duplike, ende alle tghene dair van voir hem gecomen , so hebben hem de voirs. hiemr. duechdelijc beraden ende all saken wel over gewegen ende wijsen ende verclaren voir recht dat die burgermeestern vrij sullen wesen ende geapsolveert van de voirs. Vechters aensprake, behoudelic is dat die voirs. Vechter gewijsen mach tusschen heir ende bamisse scouwe naestcomende dat hij off sijn voirvaderen de stede van Leyden tot eniger tijt mit rechte dair omme gemoyet hebben in sulken schijn dairmen besit mede breken mach. Ende in dien de voirs. Vechter dat gedaen can, soe soude hij sijn aenspreke [69r] van nyewes aen leggen mogen opten ghenen dairt hem oirbair dunct, dan geven hem op dese tijt die kenninge verloren ende die stede Leyden gewonnen. Dit vonnesse bleeff sonder wtspreack dair of te doen om dat Vechter hem sijns rechts heeft laten ontvallen.

 

Location, Folio
OAR12, 073r-a
type : Rechtsdag	date : 1437-ca	record : # 057
[030] Die kenninge tusken Zoeterwoude ende Tyelman. Inden eersten want Tielman van Buschusen aen die een sijde ende dat ambocht van Zoeterwoude an die ander sijde een kenninge dingen voir ons als hyemrade van Rijnlant, dair Tielman eyskede die van Zoeterwoude een somme die opten gemenen lande van Rijnlant om gesettet was dair wij off bekennen dat eysken van wairden want een gemeen ommeslach binnen den mercken was, mer want dat voirs. afterstall niet overgelevert en is bij onsen gesworen clercken hant die nu is off voirtijts geweest is als dat behoirt, ende dair toe een goet man van Zoeterwoude tugede bij sinen ede dat hij den voirs. eysken Boschusen naden ommeslach wel voldaen ende betaelt heeft, so geven wij die van Zoeterwoude die kenninge gewonnen ende Tielman verloren.

 

Location, Folio
OAR12, 073r-b
type : Rechtsdag	date : 1437-ca	record : # 058
[031] Item die kenninge van Leyderdorp tusken Tielman aen die een side ende Leiderdorp die ander sij voir ons hiemraden van Rijnlant so kennen wij die gemeen ommesettinge van wairden ende want Jacop Matten z. seyde in onse jegenwoirdicheyt dat Boschusen hem eyskede die voirs. somme ende Jacop gaf dat den gemenen kueren te kennen die dair opp andwoirden, so hij seyde dat sij dair niet off geven en wouden. So kennen wij die ommesettinge van wairden ende geven die van Leyderdorp die kenninge verloren ende Tielman gewonnen, ten wair dat die van Leyderdorp bewijsen mochten dat sij die voirs. somme betaelt hadde ende dat souden sij bewijsen binnen viii dagen off dat bewijs en soude hem niet te baten comen.

 

Location, Folio
OAR12, 073v-a
type : Vonnis	date : 1442-05-01	record : # 155
[032] Anno xlii meye die heemr. Poelgeest, Boechorst, Alcmade, Zwieten ende Scoten. Item die heemr. gewijst dat Simon Heynric z. mit sinen gesellen sullen him ofdijcken of mit die van Valkenburch te gelden of mit recht te weten [waren?], Claes Claes z. is willich op geset tot dat die onwillige verwonnen sijn.

 

Location, Folio
OAR12, 073v-b-078r
type : Vonnis	date : 1443-10-01	record : # 175
[033] Item omtrent Bamisse anno xliii. Soe hebben Hughe Albout ende Claes van Boschusen op dese tijt burgermeysteren van Hairlem ende van Leyden beclaecht die hoge heemrade van Rijnland voir den heer van Lalaing gouvenuer ende anders die rade mijn genadichs heren als Gerijt van Poelheest, Gerijt van Zijl, Willem van Alcmade, ridderen, Jan vander Boechorst, Boudijn van Zweten, Florijs Paedze ende Ijsbrant van Scoten, knapen ende hoge heemraden van Rijnlant up dese tijt inder manieren hier na volgende. Item clage der burgermeystern voirs. 'Item vermoegende edele heer van Lalaing gouvenuer ende ghij vrome ende wijse heren vanden hogen rade mijns liefs genadichs heren van Bourgondien gestelt tsijnre lande van Hollant, Zeelant ende Vrieslant, want die steden van Hairlem ende Leyden zeekere privilegien ende [44r] hantvesten hebben na verwijsinge enige copyen die sij u lieve heren overgeven, wair om lieve heren sij uwer eerbaerheit bidden als sij cormoedelicste mogen dat hun hoir privilegien ende hantvesten gehouden worden dat hun tot hoir toe niet en heeft mogen bueren. Voirt lieve heren vanden rade als vanden penninck gelde, sluysen, verlaten, morgengelde, ander ongelt ende ommeslach dat setten sij in handen mijns genadichs heren wes sijnre genaden dair in belieft dair sijn sij in te vreden, behoudelic dat sij hoire hantvesten gebrucken mogen. Voirt so menen sij als vanden verlate dat lest werf besteedt wert ende grote Reyner an nam datmen bevinden sal dat enige vanden heemrade half dat hout gecoft ende dat loon dair off te halven betaelt hebben, ende wes dair of gesciet is dat selmen toten ondersoeck van minen here van Lalaing.' Antwoirde der heemrade van Rijnlant op dese voirscr. clachte. 'Antwoirde der hoger heemrade van Rijnlant up sulke cedule als hun gelevert is bijden here van Lalaing van weghen der steden van Hairlem ende van Leyden inhoudende eerst aldus, want die steden van Hairlem ende van Leyden zeekere privilgien ende hantvesten hebben na verwisinge enighe copyen die sij overgeven, so bidden sij dat hem hair privilegien ende hantvesten gehouden worden dat hem tot hair toe niet en heeft mogen bueren, wair up die heemr. als dienres ende bewairres des gemeens lants also verre alst horen dienst angaet ende up corectie vanden edelen ende gemenen ingeseten hoirre heemraedscip verantwoirden dat die privilegien ende hantvesten die die steden van Hairlem ende van Leyden seggen hebben alst scijnt bijder voirscr. copye, in dien dat sij die hebben van geenre wairde en is ende na allen rechts doot, te niete ende van onwairden, want sij niet doghentlijck vercregen en sijn angesien dat dat is yegen den eet die die heemr. doen mooten, die in eenen punt inhout dat sij die lage mogen doen sullen gelijck den hogen, den armen gelijck den riken ende dair om en [44v] sijn die buergermeysters niet vorder dair in gerekent dan lantgenoten. Ende aldus en heeft die grave niet gegevene doe hij hem die hantveste gaff dat van wairden is gemerct, dat si out sijn omtrent xlvii jair, ende nye sint dat sij gegeven sijn noch bij dies graven tijden diese selve gegeven mach hebben noch bij geens anders graven tijden van Hollant sint dier tijt wesende tot desen dage toe gepossesseert off gebruyct hebben geweest, ende gedragen hem dies anden rechte. Ende al wairt dat sij van wairden waren als sij niet en sijn, so en sijn die heemr. dair van sij begeven die gehouden te hebben dat niet sculdich noch machtich te doen bi redene hier na verclairt. Die eerst is dese, die copye vanden hantveste voirscr. hout dat niet in rekeninge te doen ten sij dat die heemraders mit anderen brieven bewijsen mogen dat des billicken niet wesen en sall, so onderwijsen die hiemraders voirs. als boven dair up dat sint der tijt dat Sparendam eerst gedijct was ende die hiemraden eerst geset ende gecordineert hebben geweest dat gemeen landt dair onder gelegen goede privielgien ende hantvesten heeft van grave Florijs van Hollant beginnende tot nu toe, dair up hair voirsaten voir ende sij bij hoirren tijt die dijckaedze ende hiemraetscip ende all dat dair an cleeft geregiert ende bewairt hebben, dair sij toe geedt ende gesworen sijn ende die hantvesten ende rechten en houden nergens in eniger punte dat die heemraden rekeninge doen sullen voir yemande ende dair bij en sijn sij doch niet sculdich enige rekeninge bijden steden van Hairlem ende van Leyden te doen. Die andere redenen is dese, want die hiemraders geen ontfangers noch omme setters en sijn van enigen morgengelde dat ergent in enigen ambochten geset off gegadert wort van wat stucken dattet oick sijn van dijcken, sluysen, spuyen, huelen off wateringen dan hair penninck gelt alleen, ende dat dat doen die ambochts bewairres in allen ambochten die bijden gemeenten ende niet bijden hiemraders geset ende gekoren worde, ende sij oick van genen wercken niet wt en geven, so en mogen sij geen rekeninge doen van enich morgengelt off ommesettinge noch oich sculdich en sijn te doen, mar is wail een gewoente, want die hiemraden den lande verbonden sijn mit eede dat sij om dat lant ende lantgenoten te besorgen als enige ambochte enige wercken hebben doen maken dair sij morgengelt om setten moeten, dat sij die settinge plegen te oversien ende wair voir dat gelt gegadert sal worden, om offer yet onredelicx inden ambochts bewairres rekeninge wair dat te corrigieren dair an dat sij billick geven ondanck mer danck verdienen. Ende men sal oick niet vinden dat die ambochts bewairres den hiemraden ergent yet rekenen gegven dan hair pennincgelt voirs. Ende om vorder te onderwijsen, soe ist een gewoente in allen ambochten als die ambochts bewairres jair rekeninge doen sullen dat sij dat te voren openbaerlic doen kondigen xiiii of viii dagen te voren in allen kercken dairs noot is up dat die lantgenoten dair onder gelant die hair rekeninge willen horen dair bij comen mogen. [45r] Upten ander punt dat die voirscr. steden van Hairlem ende van Leyden scriven als vanden penninckgelde, sluysen, verlaten, morgengelt, ander ongelt ende ommeslach dat setten sij in mijns genadichs heren handen wes sijnre genade dair in belieft dair sijn sij in te vrede. Dair up is der heemr. antwoirde dattet penninckgelt sint Sparendam eerst gedijct was altoos gewoenlic is geweest te geven ende dat alle die heemr. die voir geweest sijn ende nu sijn dat gehadt hebben voir horen coste ende arbeit so dat niemant die contrarie bewijsen en sall, ende dair om die nu sijn dat oick sijn sculdich te hebben ende te ontfangen, ende dat die voirs. steden te breden sijn mit dat mijn genadige heer dair in belieft, dat hebben sij goet te lijden want sij als lichaem vanden steden geen seggen dair in en hebben vorder dan hoir poorters die lant hebben als andere lantgenoten. Ende als vanden sluysen, verlaten, morgengelde ende ommeslach hebben die heemrade genoich verantwoirdt int voorste artikel dat sij hem dair off niet en onderwinden van ontfaen noch van wtgeven ende dat sij gewijst hebben an wien dat dat coomt. Item up dat derde punt dat aldus begint 'so menen sij als vanden verlate dat lest besteedt was' etc., so verantwoirden dair op die hiemraders dat hun vreemde dunct van burgermeysters van steden dat sij upten hiemr. clagen bij mene ende dat sij dat niet verhouden en hebben totter tijt toe dat sij hoir clage van dien punte vast setten ende oick bij namen niet en noemen enich vanden hiemraders die sij yet an seggen willen, ende want dit verlaet hoiren kueren an roert, so en sij sij niet sculdich dair up te verantwoirden noch van horen vonnissen, want die graeflicheyt dat horen eedt bevolen heeft, ende want datter yemant yegens dede, die soude verbueren die hoichste buete die sij wijsen mogen na wtwijsinge der hantveste, ende wantter een out verlaet was dat hebben sij wt gekuert ende een nye dair voir ende dat besteedt als sij sculdich sijn te doen van horen diensts wegen. Item repliek der burgermeystern upter heemr. antwoirde. Up tgeent [form of hetgeen] dat die hiemraders verantwoirden dat die hantvesten die die steden seggen te hebben van geenre wairde en is want sij niet dogenclic vercregen en sijn ende dat sij tot deser dage toe niet gepossesseert noch gebruyct hebben geweest ende datmen in [45v] genen hantvesten noch rechten vinden en sal dat sij voir yemant sculdich sijn rekeninge te doen want sij ontfangers noch omme setters en sijn ende oick van genen wercken niet wt en geven, etc., hier up verantwoirden die steden dat die hantveste van wairde is ende wesen sal wantse hertoge Aelbrecht grave van Hollant zaligher gedachten bij sinen hogen wijsen ende mit voirsienicheit verleent ende gegeven heeft gelijken dat wtscrift vanden selver hantveste hier na bescreven volgende dat wtwijst upt punt dat die hantveste niet doghentlic vercregen en is, etc., twelke die steden verdunct nader groter voirsienigheit wijsheit diemen inden hiemraden seit te wesen dat sij mit sulken redenen den steden betalen willen, want onse genadige heer die voirs. hantveste ende andere confirmeert heeft om die te gebruken so dat die steden an sijnre genaden begeren ende oitmoedeliken bidden dat onse genadige heer dat punt voir den steden verantwoirden wil, so den steden dunct datter sijnre genaden ende heerlicheden meer an cleeft dan hun selven. Ende also die hiemraders over geven dat die hantveste niet gepossesseert en is, etc., dairup verantwoirden die steden dat sij anders niet en wete danse gepossesseert ende gebruyct heeft geweest is, mer heeftse niet gebruyct geweest dats overmits dat die landen in groten twijdracht ende perikel geweest ende gestaen hebben, mer nu die landen ende steden eens ende in goedn vreden sijn dair onse heer god in gelooft ende in geeert sij, so ist dat die steden voirs. nu meer vervolchs hebben van hoiren poorteren dan sij up anderen tijden gehadt hebben diet hem luden clagelic te kennen hebben gegeven hoe die hiemraders mit hem luden omme gegaen hebben. Ende al ist dat die hiemraders scriven dat sij ontfangers noch ommesetters en sijn ende oick niet wt en geven, sij sijn doch dat ende all, ende men van genen saken niet doen en mach noch ende doet ten sij wt hem ende bij hem. Item up tgeent dat die hyemraders verantwoirden als vanden penninck gelde dat sij dat altijt gehadt hebben ende dat dat lichaem vanden steden geen seggen dair meer in en hebben dan hair poorteren die lant hebben ende anderen lantgenoten, etc., hier up verantwoirden die steden want sij horen poorteren ende ommesaten verbonden sijn mit eede of men hun ongelijck doen woude dat sijse dair inne sculdich sijn te verantwoirden ende te verdadinge ende of die hiemraders hoir penninck gelt hoger setten ende nemen wouden dan sij van rechts wegen sculdich waren te doen dat sij dat bijden lichaem vanden steden mogelijc of laten souden na inhout der hantveste, mer niet min die steden setten dat tot kenissen van minen heer van Lalaing inden name van mine genadigen heer ende oick na wtwisinge hoire eygenre hantvesten willen sij die voirt brengen dair men wail in bevinden sal wat sij nemen sullen. [46r] Item up tgeent dat die heemraders verantwoirden dat hun vreemde dunct vanden burgermeesters vanden steden up den hiemr. te clagen bij meenen ende want sij niemant bij namen en noemen vanden hiemraders die sij yet an seggen will, hier up verantwoirden die steden dat dat bijden ondersoeck wes dair of is wel bevonden sal worden. Hertoge Aelbrechts hantvest gegeven inden jare m ccc xcvi op sinte Lambrechts dach pr-----, domino de Gommengijss, domino Brusonis [Brustijns?] de Herwijnde et domino Johanne de Renesse consulibus Welhelmus archideaconis Gerbrandi de Couster prepositus Monten. Hannon. ''Wij hebben gegeven ons stede van Hairlem als dat onse heemr. van Rijnlant die nu sijn of namaels wesen sullen geen morgengelt gaderen noch setten en sullen ten sij bij een of twee van onsen rade die wij dair toe voegen sullen ende bij onsen steden van Hairlem ende van Leyden, ende dair sullen onse hiemraders voirscr. goede rekeninge ende bewijsinge off doen eer sij enige morgengelt gaderen off setten mogen ten sij dat die selve heemraders mit anderen brieven bewijsen mogen dat des billicx niet wesen en sal.''' Duplike der heemrade van Rijnlant upter der steden replike voirscreven. 'Up tegeenc dat die heer van Lalaing den heemraden van Rijnlant over gegeven heeft in eenre cedule hem gelevert bij Huge Albout ende Claes van Boschusen up dese tijt burgermeesteren van Hairlem ende van Leyden in vorme van replike upter antwoirde vanden hiemraden overgegeven up een ansprake up hem gedaen bij Huge ende Claes voirn., so duplicieren die hiemraden voirs. inden manieren hier na volgende mit pretestacien dat sij onderwijsinge doen up correctie vanden edelen baermoedzen ridderen, knapen ende lantgenoten inder heemraedscip van Rijnlant geseten den welken die hantvesten vander dijckaedse ende vander heemraedscip toe behoren dair die hiemraden anders niet dan mijns genadichs heren ende des lants dienres of en sijn gelijck sij dat oick in hoir eerste antwoirde geroert hebben. Ende eerst also die replike vanden steden altoos behouden dies dat voirscreven staet inhout drie artikelen: eerst dat die hantveste van wairden is om dat hertoge Aelbrecht zaliger gedachten die gegeven heeft bij [46v] voirsienicheit van sinen rade ende mijn genadige heer geconfirmeert, etc., dair up dupliceiren die heemrade als sij eerst veranwairt hebben dat dat punte van die hantveste van onwairden is om reden in hoire antwoirde verclairt, met tegenstande dat se hertoge Aelbrecht gegeven heeft up zeker condicien dair in begrepen. Dat ander artikel is dat die steden replicieren up dat die hiemraders geantwoirt hebben dat die hantveste niet duechdelic vercregen en is, etc., dat dat den steden verdunct nader groter voirsieniger wijsheit diemen inden heemrade seit te wesen, etc., dair up duplcieren die hiemraders dat sij niet wijser en sijn dan hem god verleent heeft ende dair om en komen [konnen?] sij den steden mit gheen beter reden betalen dan hair wijsheit wt geven kan ende dat die steden smadelijc sciren [scrijven?] upter heemrader wijsheit dies en sijn Huge noch Claes te beter niet noch die hiemraders te arger mer ten derss [derff?] den steden niet vreemde duncken dat die hiemraders meynen dat dit punte vanden hantveste van onwairden is, want hem en twivelt niet als die sake voir minen genadigen geer coemt die welke die interpretacie vanden hantveste toebehoirt ende niemant anders, dat punte vanden hantveste en sal van onwairden gewijst werden al ist dat mijn genadige heere der stede hantvesten geconfirmieert heeft, dats te verstaen hantvesten die van wairden sijn mer die van onwairden sijn en konnen overmits geen confirmacie van wairde worden, want een confirmacie geen nye recht en geeft vorder dan een hantveste selve vermach, welke saken minen genadigen heer niet an en gaen vorder dan rechten te wesen tusschen partyen, ende die hantveste en is niet duechdelic vercregen bij redene want die heemraders diemen dair bij lasten wil mit rekeninge te doen ende geen rekeninge sculdich en sijn te doen om dat sij en ontfangen noch wt en geven dair niet in gehoirt noch over geroepen en sijn geweest alst blijct ende driecht [draecht?] oick tegen horen eedt die sij minen genadigen heer tot des lants behoeff gedaen hebben, oick en sijn die baermodzen ridderen ende knapen noch lantgenoten inder heemraedscip van Rijnlant geseten niet gehoirt noch geroepen geweest mit verwerven vander voirsc. hantveste buten den welken men mit rechte gheen hantvesten der hiemraidscip angaende geven en mach. Dat derde artikel is dat die steden verantwoirden up dat die hiemrade verantwoirt hebben dat die hantveste niet gepossesseert en is, etc., dair die steden up replicieren dat sij anders niet en weten dan sij gepossessiert is geweest, etc., dair up duplicieren die hiemrade dat die [47r] steden hair possessie anders sijn sculdich te bewijsen dan mit sulken reden te seggen dat sij anders niet en weten dan sij gepossessert is, so moeten hair possessie bewijsen sullen sij hem dair mede beholpen ende dat die steden voirt scriven heeft sij niet gepossesseert geweest dats overmits die twijdracht vanden lande, etc., dair up duplicieren die hiemraders datter nye so grote eendracht noch so grote twijdracht inden lande geweest en is die hiemraedscipe en heeft geregiert geweest naden hantvesten vanden lande ende bijden hiemraders dier geweest sijn so dat die reden luttel dient voirt te setten up die possessie vande hantveste. Ende dat die steden scriven dat hair poorters hem clagentlyc te kennen gegeven hebben hoe die hiemr. mit hem luden om gegaen hebben, dair up duplicieren die hiemraders wes sij gedaen hebben mitten poorteren vanden steden omme te gaen dat sij dair off mit lichte comen willen ende begeren dat Huge Albout ende Claes van Boschusen seggen ende openen willen die clage die hoir poorteren upten hiemr. voir hem gedaen hebben up dat die hiemr. die verantwoirden mogen, ende up dat sij oick niet dencken en dorven dat Huge ende Claes tgeent dat sij over geven dat hoir poorters upten hiemr. geclaecht hebben dat wt hem selven doen. Ende dair die steden voirt scriven al ist dat die hiemraders scriven dat sij ontfangers noch omme setters en sijn ende oick niet wt en geven, sij sijn dat een ende all ende men van genen saken niet doen en mach noch en doet ten sij wt him ende bij him, dair up duplicieren die hiemrade dattet wair is dat sij dair off in haer eerste antwoirde over gegeven hebben ende dat die steden up hem die contrarie niet bewijsen en sullen ende dat die saken bij hem gescien ende dat sij dair toe sien om des lants oirbair is wel mogelijc, want sij mit eeden tot des lants behoef verbonden sijn, ende die steden en sullen niet bewijsen mitter wairheit dat die hiemr. yet nyes gedaen of begonnen hebben dan him van horen voirsaten van ouden rechten ende gewoenten an gecomen is, hoe wel sij die kerwe [verwe?] voir him nemen dat tgeent dat sij soeken wt clachten van horen poorteren coemt. Ende willen die steden of hair poorteren yet clagen upten hiemraders gedaen te hebben in contrarie van horen eede ende tegen dat inhouden van horen hantvesten ende koeren, dair aff willen sij te rechte staen ende hem verantwoirden dair sij van rechts wegen sculdich sijn te verantwoirden.' Item up tgeent dat die steden replicieren up die antwoirde vanden hiemraders ruerende vanden penninck gelde, etc., [in the bottom margin is added at this point: 'ende dat sij horen poorteren ende ommesaten verbonden sijn mit eede of men him ongelijck doen woude, etc.,'] duplicieren die hiemr. gelijck sij eerst verantwoirdt hebben, dat sij hoir penninck gelt ontfaen gelijck als hoir voirsaten ende sij tot hair toe gedaen hebben [47v] des nyemant die contrarie mitter wairheit dair off bewijsen sal ende sij ontfangen up dese tijt min dan hoir voirsaten gedaen hebben alsinen dat mit ouden boeken van lxx jaren wel bewijsen mach ende houden dair toe alle jair om oirbair ende profijt slants ten minsten drie scouwe dage meer dan onse voirsaten voirtijts gedaen hebben dair sij in genen priviligien toe verbonden en sijn. Ende voir so si screven dat sij horen poorteren ende ommesaten verbonden sijn mit eede, so duplicieren die hiemrade dat wel wair mach wesen dat die burgermeesters sculdich sijn hoir poorteren voir onrecht te verantwoirden, mer dat sij mit eede horen ommesaten verbonden sijn des vervreemt den heemr., want sij dat niet meer gehoirt en hebben aengesien dat sij inden ommesaten gheen seggen en hebben noch in genen saken der hiemraedscip angaende dan also verre alst horen poorteren als lantgenoten an gaet, ende die heemrade en hebben oick geen hantvesten vanden penninckgelt dan hoir oude besit ende hair comen dair up die hiemraedscip van Rijnlant van grave Florijs nederwert dat omtrent c ende i jair geleden is geregiert is geweest, ende mijn genadige heer heeft des lants ende heemr. hantvesten van Rijnlant geconfirmeert ende hair rechten, privilegien ende hair comen geloeft ende gesworen te houden als hij van hun luden gehult was. Upt derde artikel dair in die steden replicieren dat dat bijden ondersoeck was dair off is wel bevonden sal worden, etc., dair up duplicieren die hiemrade noch als sij eerst verantwoirt hebben ende so veel vorder datmen geen ondersoeck doen en kan noch en mach partyen en moeten vast setten contrarie punten doch na dien dat Huge ende Claes eerst die hiemrade belasten willen mit menen, ende noch hem dies gedragen an ondersoeck, etc., so duplicieren die hiemrade dair up dat geen van hem luden pairt noch deel gehadt hebben in die bestadinge vanden verlate tot Sparendamme gemaect noch an genen werken bij hem van des lants wegen bestaet sint sij hiemrade geweest sijn, ende die hiemr. willen wedden ende verpenen up een pene van duysent rijders, halve tot mijns genadichs heren behoeff ende halve totter geenre behoeff die inden rechten bevonden sall worden dat Huge Albout ende Claes van Boschusen mitter wairheit niet betugen noch proeven ende sullen tgeent dair sij bij meenen die heemraden mede belasten willen. [48r] Ende also die hiemrade tot anderen tijden in tegenwoirdicheit vanden regent ende rade toe gesproken sijn geweest wt anbrengen vanden steden voirs., dat sij up dat lant in Rijnlant morgengelt omme geslagen hebben up sommige morgen v groten ende vi groten ende up sommigen vii groten, ende want die steden dair off in horen scriften niet en roeren, so dunct den hiemrade dat sij dair den heemr. grotelijck an misdaen hebben sulke saken over hem an te brengen sonder redene die die hiemrade nye gedaen en hebben noch oict sculdich en sijn te doen ende men die contrarie mit horen kueren wel bewijsen sall, ende die hiemrade willen dat oick verpenen up een pene van dusent rijders, halff tot mijns genadichs heren behoeff ende halff totter geenre behoeff die inden rechten bevonden sall worden dat die steden dat mitten wairheit upten hiemrade niet proeven noch bewijsen en sullen. Ende die hiemr. geven voirt den heer van Lalaing ende anders den heren vanden rade hier up te kennen so wie den hiemrade mit onrechte beclaecht dat die verburen elcx die hoechste buete die die hiemrade wisen mogen ende dair toe sculdich sijn minen genadigen here beteringe te doen bij minen genadigen heer ende sinen rade, ende dne hiemr. dair off en boven van horen koste die sij doen sullen om dier sake wille gelijck dat voir dese tijt wael [waer?] gewijst is bij minen genadige heer in sijnre presencien [puntien?] inden saken die die stede van Aemsterdamme tegen den heemrade wtstaende hadde, dair die hiemrade minen genadigen heer also verre alst hem an gaet laten begaen in tijden ende in wijlen ende dat den heemr. angaet als van horen koste dair aff begeren sij rechte an u heren ten eynde vanden gedinge.

 

Location, Folio
OAR12, 078v-a
type : Vonnis	date : 1446-10-04	record : # 223
[034] Item waren vergadert op die Bamis scouwe Poelgeest, Alcmaide, Boechorst, Scoten ende Symon Vrederic ende deden sulke punten als hier na bescreven staen. Inden eersten alsoo die dijckgrave Wernbout Jans z. toesprack van boeten mits een gebot dat hij gedaen hadde op den heemrade, so hebn die voirsc. heermade een vonnisse dair off gewijst in manieren als hier na gescreven staet. [57v-a] Item also Wernbout Jans z. een gebot gedaen heefft vander stede huus van Leiden openbair mitter clocke als van een bevolen scout dat geen poorter van Leiden den hogen heemraet enich morgengelt geven souden ten wair dat sij eerst hoir rekeninge gedaen hadden bij twe mijns genadichs heren rade ende bijder stede van Haerlem ende van Leyden, ende hoe wel dat Wermbout voirsc. seit dat hijt gedaen heefft wt beveel ende scriven vanden hove ende hij niet en bewijst dat hem wt den hove bevolen off gecreven is enige boeten der up te setten, so wijsen die voirsc. heemrade also Wernbout als een scout dat gebod gedaen heefft bij hem selven op een boete van tien pont, so sel Wernbout voirsc. selve in tien ponden vervallen wesen ten sij dat hij bewijsen mach dat die brieve die wt den hove quamen dat verclaerden dat hij tgebod op tien pont gebieden soude, so soude hij dair oof quijt wesen. Item hier up wort voirt gewijst dat Wernbout dat voirsc. bewijs doen soude binnen xiiii dagen voirden dijckgrave ende vier vanden heemrade.

 

Location, Folio
OAR12, 078v-b-079r
type : Vonnis	date : 1448-06-25	record : # 304
[035] Item up zulke aensprake ende eysche als die van Alphen doen den smaeldorpen als Groensfoirt, Snijdelwijc, Randenburch ende tvriambocht van Bosschop roerende van tviercant te maken ander Goutsluyse, dair inne die van Alphen segghen dat si vry of wesen souden, so is te weten dat de hoge hemraet van Rijnlant inden jaer ons heren duysent vierhondert sess ende veertich opte Bamisse scouwe een verclaringe gemaict hebben ende gesloten naden besten besceyde hoe wie ende wat elc vanden voirscr. sluyse sculdich is te maken ende als vanden viercant vanden voirnt. sluyse soude bliven te laste vanden geenen die die twiewerf lest gemaict hadden ten wair of yemant mit beteren recht him dair off wist te vrijen ende eenen sculdiger mit recht te wijsen, ende al ist dat die van Alphen de voirs. dorpen op dese tijt dair in brengen willen ende hem zelve dair of vryen, de voirs. hiemraet en dunct niet dat sij enich bewijs brengen dat sulc is, wair by sij tot desen tijt vanden viercant vander voirs. sluys sullen ontslagen sullen wesen ende wijsen ende verclaren voir recht dat die van Alphen int viercant vanden voirs. sluys sullen bliven te gelden gelijc ende tot diere tijt toe als dat voirtijts overdragen ende gesloten is geweest, ende gheven die voirs. dorpen die kenninge gewonnen ende die van Alphen verloren.

 

Location, Folio
OAR12, 079r-a
type : Vonnis	date : 1447-11-14	record : # 288
[036] Des dijnxdages na sinte Mairtijns dach inde winter anno xlvii waren vergadert tot Leyden bijden dijckgrave int recht Poelgeest, Zijl, Alcmade, Zwieten, Schoten ende Simon Vrederic. Item op die zelve tijt wort overdragen dat Pieter Vogelair ende Claes sijn broeder zullen doen sulke beteringe als hier na gescreven staet. Voir dat sij den drayboom tusschen Aemsterdam ende Sparendam mit crafte ontwien gescoten ende up gebroken hebben ghelijc als dat wel over hem betuycht is, dats te weten dat die hoge hiemraet over hem gebonden hebben dat sij mit recht vervallen souden wesen inde hoichste boete, te weten in twie werf lxx lb., die welke sij van gratie beteren sullen mit x ponden, te betalen tusschen dit ende sinte Pieters dage naestcomende. Ende wairt dat sij die x pont binnen den voirs. tijt niet en betailden of hier namels enige zaken deden den voirs. hiemraet tegen dragende, so souden sij binnen achte dagen nader hiemrader vermanijnge die voirs. hoichste boete heel betalen of souden balling slants dair of bliven gelijc of sij mit rechte ballinc lants geleyt waren.

 

Location, Folio
OAR12, 079r-b-079v
type : Vonnis	date : 1447-05-02	record : # 228
[037] Item op die mey scouwe waren vergadert tot Hairlem Poelgeest, Alcmaide, Boechorst, Zweten, Scoten ende Symon Vrederic Item also die dijcgrave Willam Kuysker van Boschuizen toespraect hem, aen seggen dat hij binnen den merken van Sparendamme heeft doen visschen mit staende touwe dat hij dair an verbuert soude hebn na wtwijsinge der hantveste, [58v] dats te weten die hoechste boete. Dair Willam Kuzer voirsc. weder op antwoirde seggende dat hij vri wesen sal vander aenspraeck bij tween punten, in den eersten so hij dat selve niet bevisschet en heefft ende een ander die vischerie over gegeven heefft die te bevisschen na ouden costumen gelijc die rentemeester van Noortholland die pleecht te verhueren, seit voirt dat hij oec niet gedaecht en soude wesen als recht is mits dat sij niet gedachte en is van des hoves bode mer vanden heemr. bode. Dese voirsc. saken doirgesien ende wel overwegen alle tghenc dat voir den heemr. van Rijnlant gecomen is, so wijsen die voirsc. heemr. also sij warachtelic bevonden hebn dat Willam Kuser voirsc. die voirn. visscherie selve heeft doen bevisschen mit sijn selffs korven ende reescip ende die visch hem gelevert is en na horen rechten hair bode wel dagen mach, so sel die voirsc. Willam Kuser inden boeten vervallen wesen na wtwijsinge der hantveste, behoudeliken dat sij overdragen sijn mitten dijckgrave dat hij dat genedeliken beteren sall.

 

Location, Folio
OAR12, 079v-a-080r
type : Vonnis	date : 1453-02-25	record : # 497
[038] Also een dingtael ende kenninge gehangen heeft voirden hogen heemr. van Rijnlant tusschen Sasbout Aelwijns soon als aenspraker ende Eggert Vrancken z. ende Vranck Jacops soon als verweerres in welker dingtail Sasbout voirn. hem beclaicht dat Eggert ende Vranck voirn. hem gepandt hebben van zekere sommen van gelde die up hem geset waren inden ambocht van Zegwairt die hij seide dat hij niet sculdich en was om redene in sijnre dingtail begrepen, mede dat hij dair off gepant was bij des heemraets bode die daer of mit rechte geen pandinge doen en mochte, overmits datter gelt daer hij voer gepant was van brueken roerde dair nyement off panden en mochte dan des hoefs bode, mede om dat vanden gelde geen rekenninge gedaen en was voirden bueren noch voirden heemraden, mit meer redenen die die voirn. Sasbout dair toe voirt bij brochte, seggende ende sluytende dat dat recht ende pandinge op hem gedaen mit onrecht gheschiet was ende dat die voirn. Eggert ende Vranc hem sculdich sijn dat te beteren off vijftich pont dair voir te geven. Wair op Eggert voirn. eerst antwoirde ende dingde dat hij den voirn. Sasgout geen gelt geeyscht noch dair off gepant en hadde. Ende die voirn. Vranck Jacops soon antwoirde ende dingde dat hij bekende dat hij den voirn. Sasbout gepant heeft om dat hij sijn gelt dair hij biden genen dier toe geset waren om den ommeslach te doen vanden gelde dair hij mede inne getaxeert was ende dair om sculdich was te betalen niet betalen en woude ende dat hij dair om bij des heemraets bode die hem bij enich vander hemraet toe genoecht was hem gepant hadde dair hi geen pantkeringe off gedaen en hadde ende dair omme hem zijn pande mit rechte of geschat waren mit meer redene die die voirn. Vranck dair up bij brachte, seggende ende sluytende dair up dat tgeenc dat hi gedaen hadde mit recht gedaen hadde ende sculdich [80r] is voirtganck te houden. Ende vanden vijftich ponden die hem Sasbout eyscht onsculdich is, welke dingtael an bijden zijden bijden voirsc. heemraden wail doersien wesende sij hebben dair up ondersoec gedaen ende tugen gehoirt an bijden zijden in all dat partyen hebben willen proevieren ende dair nae inder sake gewegen dat dat ommesette gelt dair Sasbout inne getaxeert was spruyte tot een compositie ende verding gemaect tusschen den heemraet van Schielant ende den buyren van Segwaert van consente om hoir lant te mogen delven dair die heemrade van Schielant geen execucie van rechte off crijgen noch doen en konden buten hulpe vanden heemraden van Rijnlant daer die bueren van Segwaert den heemraden van Rijnlant om geboden hebben alsoe dat lant in die Segwaert in die hiemraetscip van Rijnlant gelegen is dair den heemraet van Rijnlant die kennisse vorder execucie off toebehoirt mit horen bode ende nyement anders. Ende want all dair ingewegen dat mit recht dair in behoirt gewegen te wesen, soe wijsen die voirsc. hoge heemrade van Rijnlant voir recht dat die voirn. Sasbout mit onrechte hem beclaecht heeft vanden voirn. Eggert Vrancken z. ende Vranck Jacops soon ende wijsen dair om den voirn. Eggert ende Vranck die kenninge gewonnen ende Sasbout verloren, ende dat hij dair om betailen sall ten coste vanden heemraden als van outs gewoenlic is ende sulken coste als partijen an beiden zijden hier om gedaen hadden sal elc houden om hem selven als oick van outs gewoenlic is, overmits dat dese dingtael ende kenninge begonnen ende angeleit was voirder tijt dat die heemrade den kuere vanden costen van partijen gemaect ende geordineert hebben gecondicht ende geopenbaert was.

 

Go to Folio's ...
000	010	020	030	040	050	061	070	080	090	100	110	120	130

 

Author	Publication	Home
William H. TeBrake Maine, USA, June 2006	Rijnland OAR11, OAR12, OAR13	www.oudleiden.nl

 

Hoogheemraadschap Rijnland OAR 11, 12, 13 : 1253 - 1564
	View: Register OAR 12 Pages 061 - 069

 

Go to Folio's ...
000	010	020	030	040	050	061	070	080	090	100	110	120	130

 

Location, Folio
OAR12, 061v-a-062r
type : Vonnis	date : 1363-08-04	record : # 045
[004] Aelbrecht bijder goids genaden palensgrave upten Rijn, hertoge in Beyern, ruwairt van Henegouwen, van Holland, van Zelant, etc., doe kond allen luden dat wij by onsen rade gemeenlic van Hollant ende biden gemenen hiemr. van Rijnlant overdragen sijn een voirwaerde ende een ewichs gesceit mit onsen goeden luden van onsen lande van Woirden die gelant sijn inden waterganc van Sparendam ende dair wt te wateren plegen in manieren ende voirwairden hier na gescr. Inden eersten, alle die gene die up die zuutzijde gelant sijn ende nu ter tijt wateren in die Ysele, die zullen geven vander morgen x vlaemsche groten, ende dair mede sullen zij vrij ende quijt wesen ende ewelijc gesceyden van allen rechte dat sij in Sparendam plagen te hebben, ende van onrade dat dair in roerende is ende sij en sullen nu voirt nemmermeer inden Rijn wateren tot den waterganc van Sparendam wt. Voirt alle die gene die up die zuutzijde voirsc. gelegen sijn ende nu ter tijt genen waterganc in die Ysele en hebben, die sullen geven vander morgen v vlaemsche grot, ende die sullen bliven in allen rechte dair die noirtside in bliven sel. Voirt alle die gene die an die noirtside gelegen sijn sullen geven v vlaemsche grote ende dair mede sullen sij gebetert hebben ale versumenes ende brocken die sij tot desen dage toe gehadt hebben roerende van Sparendam, ende nu voirt sullen sij maken ende houden twee slusen in Sparendam met den goede luden vanden Gestichte die mede tot Sparendam wt wateren sullen ende alle waterganc ende werc bewaren ende houden als sij van outs plagen te doen, wtgeseit dat sij mer twe slusen houden en sullen als voirsc. is, ende dit voirsc. salmen betalen die een helft tot onser vrouwen dage naest comende assumptio ende die ander helft tot Lambert misse daer naest comende, of binnen iii weken na elke dage voirsc. onbegrepen. Ende om dat wij willen dat dit stade ende vaste bliven ende ewelijc onverbroken, so hebben wij desen brief open bezegelt mit onsen zegel, ende hebben mede bevolen onsen welgeboren hiemr. van Rijnlant want sij over alle dese voirsc. voirwaerden geweest hebben van des lants wegen van Rijnlant dat sij desen brief mede bezegelen. Ende wij Reyner Dever ridder, Heinric van Alcmade Ysbrants z., Florijs van Alfen, Ysbrant vander Scuyer, Willem van Lewen, Diddeboy van Catwijck, [26v] ende Boudijn Jans z. knapen, hiemr. van Rijnlant, want wij over alle dese voirsc. saken geweest hebben, so hebben wij desen brief mede besegelt bij behieten ons liefs heren hertogen Aelbrecht mit onsen segelen. Gegeven inden Hage des vridage na ad vincula Petri int jair ons heren m ccc lxiii.

 

Location, Folio
OAR12, 062v-a
type : Vonnis	date : 1438-ca	record : # 065
[005] Item soe sullen Vrancken kinderen van Zanen bliven inden eygendom vanden lande geheten den Droen, ende wes aerde der wt gesleghen is seer die tijt dat sij inden eygendom geweest hebben van dat Willems weduwe van Zanen dat over gaf, sy sullen sijt selve ontfaen ende daer of dijcrecht plegen alst behoirt, ende dair voir zeer dat Vranck van Zanen lant vluchtich was tot dat sijt an tasten als voirs. is, soe sel dat aertgelt staen tot goetduncken vanden raed alsoet dair zoen an roert.

 

Location, Folio
OAR12, 062v-b
type : Vonnis	date : 1416-01-09	record : # 066
[006] Wij Jan vanden Woude heer van Warmond, Gherijt van Zijl, ridderen, Jan vander Woude, Jan vanden Boechorst, Florijs van Tol, Vranck van Zanen, ende Symon vanden Scuer, knapen, doen condt allen luden dat wij vercoft hebben tot enen vryen eygen Lambrecht Lamberchts z. twee stucke lants bijden Hoope sonder maet also groet ende also cleyn alst dair gelegen is inden ban van Sparenwoude buten den tIJdijck ende geheten die Droenen, twisken Claes Airnts zs. erfnamen an die een zijde, die stoelen van Sparenwouder dijck an die ander zijde, al om streckende an die tYe, ende noch een stuck lants geheten dat wester hogher lant also groet ende also cleyn alst dair gelgehen is inden ban van Velzen, twsken den behinen lant van Hairlem ende capellen lant van Sparendam an die een zijde, Allijn Gruierts z. an dander zijde, al om streckende an die tYe. Ende verlyen ons al voldaen ende wel betaelt den lesten penninc mitten eersten ende hebbent him gheloeft te waren alsinen vrij lant sculdich is te waren een ygelijck inden banne dairt gelegen is. In oirkonde desen brieve bezegelt mit onsen zegelen in jair ons heren duysent vierhondert ende vijftien des dijnxdachs naden heyligen dertyen dach.

 

Location, Folio
OAR12, 062v-c-063r
type : Vonnis	date : 1421-01-08	record : # 067
[007] Baertout Heynricx z. scout van Sparenwoude doe condt allen luden dat voir mi quam Lambrecht Lambrechts z. ende gheliede dat hi over gegeven ende qwijt gesconden heeft Pieter van Zanen clerck alsulc lant als hi gecoft hadde jegens die hoghe wel geboren hyemrade van Rijnlant dat gelegen is buten dijcks ende geheten is die Noort gelegen inden ban van Velzen. Ende ghelyede him Lambrecht voirs. hier of al voldaen ende wel betaelt, den lesten penninc mitten eersten, ende gheloofde dat te waren in alre manieren als die voirseyde heemraders brief die Lambrecht dair of hadde inhout. Hier [32r] waren bij ende over als tuge ende buer Allert Ysbrants z. ende IJsbrant Claes Hermans z. In kennisse der waerheit, soe heb ic Bertout scout voirs. desen brief bezegelt mit minen zegel int jair ons heren duysent vierhondert ende twintich naden loop des hoofs van Hollant, des woensdages naden heyligen dertyenen dach [i.e., 1421].

 

Location, Folio
OAR12, 063r-a
type : Vonnis	date : 1426-09-26	record : # 068
[008] Phillips, etc. [Philip the Good, Duke of Burgundy] ontbieden ende bevelen u allen onsen goeden luden ende ondersaten gheseten binnen den dorpen van Sparenwoude ende Sparendam dat ghij wtreyct ende betaelt Vrancken kinder van Zanen sulc aertgelt als ghij him sculdich sijt ende ghij nu in uwen ghemen oirbaer wt horen lande hem of ghedolven hebt sonder langher vertreck off merring dair of te maken, ende wairt dat ghij des niet en dedet, soe wouden wij den selven kinderen rechts dair of gonnen op enen ygeliken die in ghebreke dair of is ende mit onsen heemraders dat wt doen panden als dair toe behoert sonder des yemande te verdragen in eniger wijs. In oirkonde desen brieve ende onse signet hier up gedruct. Gegeven upten xxvi sten dach van septembri in jair ons heren dusent vierhondern ses ende twintich.

 

Location, Folio
OAR12, 063r-b
type : Vonnis	date : 1437-00-00	record : # 069
[009] Anno xxxvii Der heemrader vonnes: Aldus wijsen wij alsoe Pieter van Zanen sprect mit sinen brieven in welken hij bewijst dat hij den voirsc. Droen gecoft heeft ende wij gheen brieve of anders enich betoon in contrarie gesien hebben dairmen die voirs. breive mede deden sal dat Pieter van Zanen sculdich is sijn aertghelt te hebben dat hem gebrect vanden tijt datten Droen eerst sijn wert van des him dair of onbetaelt is totter heemraden goet duncken, ten wair ofmen mitten hof van Hollant mochte bewijsen dat Pieter van Zanen voirvluchtich off balling slants van Hollant geweest had voir den date mijns genadichs heren brief van Bourgongne hier voir gescreven.

 

Location, Folio
OAR12, 063v-a
type : Vonnis	date : 1437-00-00	record : # 070
[010] Anno xxxvii --------ij' Noch een vonnes der heemr.: Item also den wtersten dach huden was twsken Florijs van Sparenwoude an die een zijde ende Vrancken kinder van Zanen op die ander zijde om der dingtael wille die sij onderlinge hadden van aertgeld vanden Droen, in welker dinctael Florijs voir him nam dat mijn heer van Beyeren den Droen Willem van [32v] Zanen gegeven had, alsoe Vranc van Zanen mit wijf ende mit kinderen voirvluchtich was, ende dat hij Willem van Zanen dair of vernoecht had, soe seyde Florijs bij die reden dat hi hem niet sculdich en waer te gheven, dair Vrancken kinder weder op antwoirden ende spraken op hair brieve die Pieter van Zanen dair of heeft geliken hier voir gescreven staet.

 

Location, Folio
OAR12, 063v-b-064r
type : Vonnis	date : 1437-06-21	record : # 071
[011] Up dat vonnes voir gewijst twsken Pieter van Zanen ende Florijs van Sparenwoude dair up hebben die rade mijns gendaichs heren gescreven anden hyemraet gelijc hier na gescreven stait: 'Lieve getruwe ende geminde also ghij voir dese tijt een vonnes gewijst hebt dat Pieter van Zanen sculdich is sijn aertgelt te hebben dat hem ghebrect vanden tijt datten Droen eerst sijn wort, van des hem dair of onbetaelt is tot uwen goetduncken, ten wair ofmen mit onsen hove van Hollant mochte bewijsen dat Pieter van Zanen voirvluchtich of baling onser lande van Hollant geweest hadde voir date van onsen brieve die Pieter voirn. van ons heeft, ende die selve Pieter hier om an geschille staet mit Florijs van Sparenwoude, soe is dese sake gecomen voir onsen getryuwen rade gestelt ten saken van onsen lande van Hollant die beyde pertyen hier up gehoirt hebben ende oick sulke tugen als sij him van beyden zijden elcx vermaten ende en konnen niet bevinden naden tuge die sij gehoirt hebben dat Pieter voirn. ye balling of voirvluchtich onsen lande van Hollant geweest is, ontbieden hier om ende bevelen mit aernst dat ghij dese sake voirt termineert ende dair in doet bij rechte of bij ghenoege als dar behoirt van redenen wegen gedaen te wesen dat en laet in geenrewijs onse heren god ijs mit u. Gesc. den een ende twintichsten dach in junio.'

 

Location, Folio
OAR12, 064r-a
type : Vonnis	date : 1438-07-01	record : # 072
[012] [In left margin: 'Anno xxxviii te Does scouwe'] Dat wterste vonnes van deser sake. Item up dat voir gewijsde vonnes twsken Florijs van Sparenwoude ende Pieter van Zanen, soe wijsen wij voirt aldus na inhout der brieve die mijn genadige heer dair of gescreven heeft, dat Pieter van Zanen hebben sal van elke roede aerde een lelyde plack. Des sal die hiemr. aldair senden ende den wale doen meten in hairre beyden yegenwoirdicheit also verre als sij dair comen op een vrijdach naestcomende ende wes Florijs voirn. buert te gelden sal hij betalen nu te Bamisse naest comende. Die heemraden van deser sake Gillis van Cralinge, Gerijt van Poelgeest, Gerijt van Zijl, ridderen, Jan vanden Boechorst, Boudijn van Zweten, Florijs Paedzen ende ['Meynert Claes zoon' is crossed out] Ysbrand van Scoten.

 

Location, Folio
OAR12, 064r-b-064v
type : Vonnis	date : 1415-01-09	record : # 073
[013] Item Jan vanden Woude heer van Warmonde, Gherijt van Zijl, ridderen, Jan van Woude, Florijs van Tol, Jan vanden Boechorst, Vranck van Zanen ende Simon vanden Scuer, knapen, doen condt allen luden dat wij sculdich sijn Witte Jacob Buzen zoen often houder van desen breive bij sinen wille hondert twee ende vertich pont tien scelling hollants payments die wij him gelooft hebben ende geloven wel te betalen tot meye dage naestcomende, ende waert sake dat wij des niet en deden soe hebben wij vorder ghelooft ende geloven bij onsen truwen eeren ende zeekerheden ende in rechter eedscat in te comen tot vermenen Witte Jacops z. of den houder sbriefs binnen Hairlem in Heynric Aernts zoens hws ende dair in te leysten ende tydige maeltijden te houden na goeder luden zeede elc mit ons selves live ende wt der voirseyden stede ende leystinge niet te sceyden in geenrewijs voir die tijt dat wij Witte Jocops z. of den houder sbriefs voirs. vol ende al betaelt hebben die somme gelts voirs., den lesten penning mitten eersten, ende den waert vernoecht van sinen cost. In oirkonde desen brieve bezegelt mit onsen zegelen int jair ons heren dusent vierhondert ende vijftien, des dijnxdage naden heyligen dertienen dach.

 

Location, Folio
OAR12, 064v-a
type : Vonnis	date : 1415-01-09	record : # 074
[014] Wij Jan vanden Woude heer van Warmonde, Gherijt van Zijl, ridderen, Florijs van Tol, Jan vanden Woude, Jan vanden Boechorst, Vranck van Zanen ende Simon vanden Scuer, knapen, doen condt allen luden dat wij sculdich sijn Robbrecht Claes z. of den houder van desen brieve bij sinen wille hondert twe ende tseventich pont vijf scelling ende ses penning Hollants payments die wy hem gelooft hebben ende geloven wael te betalen op den pinxster dach naest comende, ende waert saeck dat wij des niet ende deden, soe hebben wij voirder gelooft ende geloven bij onsen truwe eeren ende zekerheden ende in rechter eedscat in te comen tot vermanen Robbrecht Claes zoons of den houder sbreifs binnen Hairlem in Heynric Airnt zoons hwys ende dair in te leysten ende tydige maeltide te houden na goeder luden zeede elc mit ons selves love ende wt der voirs. stede ende leystinge niet te sceyden in geenrewijs voir die tijt dat wij Robbrecht Claes z. of den houder sbriefs voirs. vol ende al betaelt hebben die summe gelts voirs., den lesten penning mitten eersten ende den wairt vernoecht van sijnen cost. In oirkonde desen breive bezegelt mit onse zegelen int jair ons heren dusent vierhondert ende vijftien des dinxdage naden heyligen dertienen dach.

 

Location, Folio
OAR12, 065r-a-065v
type : Vonnis	date : 1419-10-02	record : # 075
[013a] Wij Gillis van Cralinge ende Gherijt vander Zijl, ridderen, Gherijt van Poelgeest, Florijs van Tol, Jan vanden Boechorst, Vranck van Zanen ende Claes van Ruven, knapen, hoge hyemr. van Rijnlant doen condt allen luden dat wij van des lands wegen van Rijnlant gelyen sculdich te wesen Willem Dobbe z. of den houder van desen breive hondert goeden gouden engelschen noblen of payment hoirre wairde die hij ons tot des lants behoef van Rijnlant onder gedaen heeft om tien engelsche nobel sjairs te renten die wij hem of houder sbriefs samentlijc ende elc voir al geloeft hebben ende geloven volcomelike ende wel te betalen ende comer vrij te leveren binnen der staet van Utrecht inden wisselen, alle jair op sinte Baven dach of binnen achte daghen dair na onbegrepen, ter tijt toe dat wij Willem off houder sbreifs dese hondert engelsche noblen weder betalen ende hem dair toe gheven also veel renten als wij hem op die tijt naden beloep vanden jair sculdich sullen wesen. Ende wairt sake dat wij Willem of houder des breifs dese renten alle jair upten termijn voirs. niet en betaelden ende wij des van Willem of houder sbriefs vermaent worden mit Willems of houder sbriefs openen breiven, soe hebben wij eedscat in te comen leysten binnen die stat van Utrecht elcx van ons mit drien paerden ende mit tween knechten in Waelkijns herbergh dair hij nu ter tijt in woent aldair te leggen ende te leysten na goeder luden zeede ende niet van daar te sceyden voir der tijt dat wij Willem of houder sbriefs dese voirs. renten vol ende al betaelt sullen hebben, den lesten penning mitten eersten, ende den waert vernoicht van sinen cost. Ende tot wat tijt dat wijt Willem of houder sbriefs een halve jair te voren seggen of doen seggen of dat hijt ons also lange te voren seit of doet seggen, soe sullen wij dese hondert noblen voirs. volcomelijc ende al weder betalen ende dair toe alsoe veel renten als wij hem op dien termijn naden beloep vanden jair sculdich sullen wesen, ende dair mede soe sullen wij desen breiff mogen lessenen. Ende wairt dat wij des niet en deden als wij des van Willem of houder sbreifs vermaent waren gelijc voirs. is, soe hebben wij vorder gelooft ende geloven bij onsen truwen eeren ende zekerheden in rechter eedscat in te comen leysten binnen der stat ende inden selver herberge voirs. elcx van ons mit drien paerden ende mit tween knechten ende dair te leysten als voirs. is ende niet van dair te sceyden voir dat tijt dat wij dit voirs. hooftgelt mitten renten vol ende al betaelt sullen hebben, den lesten penning mitten eersten, ende den wairt vernoicht van sinen cost sonder enige weer hier op te doen mit enigen rechte geestelijc of wairlijc ende alle dingen sonder argelist. In oirkonde des briefs bezegelt mit onse zegelen hier an gehangen int jair ons heren dusent vierhondert ende negentien smanendages na sinte Baven dach.

 

Location, Folio
OAR12, 065v-a
type : Vonnis	date : 1431-09-05	record : # 176
[014] Wij Gillijs van Cralingen van Voirscoten, Gerijt van Poelgeest van Hoichmade, Gerijt vanden Zijl heer van Purmereynde, ridderen, Boudijn van Zwieten trezorier van Hollant, Jan vander Boechorst heer van Noortigherhout, Florijs Paedze, Meynairt Claes z., knapen, hoge hiemraden van Rijnlant, doen condt allen luden dat wij van des gemeens lands wegen van Rijlant mit Jan Wouters z. ende Clais sinen zoon overdragen sijn dat sij angenomen hebben voir hem ende voir heren erven te maken ende te houden die hoge breede vanden Zeedijck, gelegen bij Costverloren neffen Jan Wouters zoons ende Clais sijn zoons zaet ter Halver weteringe toe die nu Costverloren hiet, erflic ende eygenlic up dat voirs. lant durende tot ewigen dagen. Ende hier voir hebben wij hoge hiemr. voirgen. van des gemeene lants wegen voirs. quijt gesconden ende gegeven quijtscelden ende geven voir ons ende voir onse nacomelingen Jan Wouters zoon ende Clais sinen zoon voirs. ende horen nacomelingen tot enen vryen eygen die cadijck tot Costverloren binnendijck ende butendijck also groot ende also cleyn als hij up Jan Wouters zoons ende Clais sins zoons zaten voirs. gelegen is ter Halver weteringe toe, ende sij den lande van Rijnlant voirs. toebehoren plach. Ende hebben hem vorder geloeft ende geloven niet te dijcken wt die voirs. zaten in geenre wijs bij staenden dijck. In kennisse der wairheit hebben wij hoge hyemraedt voirgen. onse zegelen tot enen getuge an desen brief gehangen, int jair ons heren dusent vierhondert ene ende dertich upten vijften dach in septembri.

 

Location, Folio
OAR12, 065v-bis; OAR12, 073r-c
type : Vonnis	date : 1437-05-07	record : # 112
[016] [000] Anno xxxvii tot meye. Item Clais Jan Wouters z. sal hebben ende houden den kadijc op sijn lant gelegen bij Costverloren tot eygen ende ewigen dagen, ende dair voir sal hij weder hebben ende houden voir him ende sijn erven den dijck tot Costverloren, te weten vanden zwtoost eynde in ant enden van sinen dijck totter Halver wateringe toe, dats te verstaen aldair die leste sluse van Costverloren lach ende op gebroken wort, ende aldair brieven of geven ende nemen als dat behoirt. Hier waren bij burghermeesteren van Aemsterdam Ruus Jacops z., Auwel Pieters z. ende Jan Bet, ende sijn oude voirwairden salmen verclaren bij Auwel ende Reyner [Reynerszoon].

 

Location, Folio
OAR12, 066r-a
type : Vonnis	date : 1431-09-05	record : # 177
[015] Ic Aernt Vechterszoon doe condt allen luden dat ic an ghenomen heb vanden gemeenen lande van Rijnlandt voir mi ende voor minen erven eygelijc ende ervelijc tot ewigen dagen die hoge brede vanden Zeedijck bij Aemstelredam geheten Costverloren also groot ende also cleey als hi gelegen is op mijn zaet nu ter tijt is gelegen an Costverloren streckende den voirs. dijcke zwtoostwairt ter Halver weteringe toe, dair si mi voir gegeven hebben den cadijck tot Costverloren gelijc mijn breive dair of inhouden. In kennisse der wairhede so hebbe ic desen brief bezegelt mit minen zegel, int jair ons heren dusent vierhondert een ende dertich upten vijften dach in septembri.

 

Location, Folio
OAR12, 066r-b-066v
type : Vonnis	date : 1443-07-25	record : # 178
[017] Wij Gerijt van Poelgeest heer van Hoichmade, Willem van Alcmade ende Gerijt van Zijl, ridderen, Jan vander Boechorst, Boudijn van Zweten, Florijs Paedze ende YJsbrant van Scoten, knapen, hoge hiemr. van Rijnlant, doen condt allen luden dat gecomen is Aernt Vechters z. [49v] inden jair van een ende dertich [1431] lestleden voirden hogen hiemraet van Rijnlant doe ter tijt wesende ende heeft aengenomen vandes gemeens lands wegen van Rijnlant voir hem ende sinen erven eygentlyc ende erflic die hoge breede vanden Zeedijck bij Aemstelredamme geheten Costverloren also groot ende cleyn als hij gelegen is op sijn zate doe ter tijt gelgen in Costverloren streckende den voirs. dijck zwtoostwairt ter Halver wateringe toe, dair sij him voir gegonnet hebben ende gegeven vandes lands wegen van Rijnland den cadijck tot Costverloren gelijc sijn brieve dair off inhouden, des so is gecomen inden jare van twee ende vertich [1442] Vechter Airents zoon die in desen rechten bestorven is van sinen vader voir ons heemr. nu ter tijt wesende ende heeft op gedragen ende overgegeven all last, profijt, recht ende toe seggen dat hij hadde vanden Zeedijck bij Costverloren ende cadijck als boven geroert is tot behoeff Reyner Reyners z. ende sinen erven eygentlic ende erfflic dat hij dien Zeedijck bij Costverloren boven bepaelt houden sal mit sulken prouffite als Airnt Vechters zoon ende Vechters Airnts zoon dair off gehadt hebben, ende die breive die dair of sijn dat wtwijsen tot der Halver weteringe toe, dats te verstaen ter Halver sluyse toe dair die laiste sluyse gelegen heeft van Costverloren, ende dat hij noch sinen erven dit niet vervreemden noch vercopen en sullen buten den heemr. voirs. Ende want ons hoge heemr. voirs. kundich is ende dese overgifte bij onsen consente ende wille vandes lands wegen van Rijnlant gesciet sijn, so hebben wij in kennessen ende getugenesse der wairheit onse zegelen an desen brieff gehangen, ende deser brieve sijn twee alleens sprekende, dair wij den enen voir ons in den gemeenen lande van Rijnlant of hebben ende den anderen gelevert Reyner voirsc. voir hem ende sine erven. Gegeven des dijnxdages na sinte Jacobs dach apostel int jair ons heren duysent vierhondert drie ende veertich.

 

Location, Folio
OAR12, 067r-a
type : Vonnis	date : 1449-07-01	record : # 493
[018] Wij Gerijt van Poelgeest heer tot Hoochmade, Willem van Alcmade heer tot Engelen ende tot Vlimen [Vlunen?], Gerijt van Zijl ridderen, Jan vander Boechorst, Jan van Poelgeest, Ysbrant van Scoten ende Symon Vrederick knapen hoge heemraden van Rijnlant doen cond allen luden dat inden jair van negen ende veertigen upten vierden dach in marte gecomen is Pieter Willems z. wonende tot Sloterdijck ende heeft angenomen bij consente van ons heemrade voir hem ende voir sinen erven eygentlijck ende erflic die hoge brede vanden Zeedijck bij Aemstelredam geheten Costverloren also groot ende also clein als hij gelegen is ende Reiner Reiners z. saliger gedachten die van Vechter Aernts z. overnam ende Lijsbet Reyners wedwye tot nu toe gebruuct ende gebesicht heeft ende den voirn. Pieter voirt overgegeven heeft in allen scijn als Aernt Vechters z., Vechter Aernts z., Reyner Reiner z. ende Lijsbeth Reyners wedwye dien een naden anderen tot nu to gebruuct hebben, te weten dat Pieter Willems z. voirn. den voirnoemden Zeedijck boven bepaelt houde sal mit sulken profiten als die voirsc. personen dair op gehadt hebn gelijc den ouden brief die men hier casseert wel begrijpt, dats te verstaen totter Halversluse toe dair die laetste sluys gelegen heeft van Costverloren, mit voirwaerden dat Pieter voirsc. of sijn erven dit niet vercopen noch vervreemden en sullen mogen buten consente ende wille der voirseider heemrade ende want onse hoge hiemr. dit condich is, so hebben wij in getugenisse der wairheit onse zegelen an desen brief gehangen. Gedaen opten eersten dach in julio int jair ons heren dusent vierhondert ende negen ende vertich.

 

Location, Folio
OAR12, 067r-b-067v
type : Vonnis	date : 1447-06-27	record : # 230
[019] Item op die Does scouwe waren vergadert tot Leiden alle die heemr. Een vonnisse. Item also Jan Boem als procurateer vandes comenduers wegen van sinte Jan dingplechtich geworden is tegen den heemr. vanden Hogen veen, seggende in hoirre dingtalen dat die vanden Hogen veen den voirsc. comenduer ende sijn goeds huus scade gedaen hebn an zekeren lande leggende inden ambochte van Hazerswoude twelc dat sij offgevaeren, offgetreden ende off gedolven souden hebn boven enich eygendom dat sij dair an hebn mochten ende datmen den voirsc. omme daer dat sculdich wair te beteren bijden hgenheemr. mit meer woirden als sij hem in horen dingtalen vermaten, etc. dair op dat die voirsc. heemr. vanden Hogen veen antwoirden seggende dat sij der voirsc. heren lant niet offgevaren en hebn dan is die vaert gewyet dat is van hoir selffs gesciet wan dat lant an beiden zijden hem toe behoren soude, ende die kade den wal an die een zijde dat den Baerl heet tusschen der heren lant van sinte Jan ende hoir waterscip hem toebehoren soude ende dat rustelic ende vredelic gebrwct souden hebn ende hor banwerk dair op gemaect meer dan xlvii jair lang en bescouwet vanden scout van Hazerswoude als hoir antwoird dat sijt lange verclairde, etc., dair off dat partyen gegaen sijn aen een kenninge vanden hogen heemr., hier op hebn die heemr. voirsc. hem beraden ende getuuch dair off gehoirt ende die wel doirsien ende voirt alle besceit dat voir partyen voir hem ge- [59r] comen is, ende wijsen ende verclaren voir recht alle zaken wel overgewegen ende die kueren die sij vanden voirsc. Baerle vijnden bescreven dat die vanden Hogen veen den eygendom toebehoirt vander kade den Baerle heet iiii voeten breet ende twe voeten hoge wt den water. Ende die also sculdich sijn te houden buten des polres coste dair die omme gelegen is, dats te verstaen dat die aerde dairmen die voirsc. kade mede maken sall die vanden Hogen veen mit hem sullen doen brengen off ist dat die genomen wort omtrent der kade wt der heren lant van sinte Jan off anders, dat sullen die vanden Hogen veen altijt gelden totter hoge, heemr. gesceidenheit, ende geven dair om die vander Hogenveen die kenninge gewonnen ende den heren van sinte Jan verloren.

 

Location, Folio
OAR12, 068r-a
type : Vonnis	date : 1442-12-20	record : # 184
[020] Item ic Heynric van der Hoe de ambochts bewairre van des ambochts wegen van Coudekerck doe condt allen luden want een kade gelegen was buten den ambocht van Coudekerck up Claes Heymans wetering die bij goet duncken heren Gerijt van Poelgeest onse ambochts heer ende Jan Jacopzoon onsen scout mitten meesten deel vanden bueren bij goetduncken vanden hogen heemr. van Rijnlant, overmits dattet meer oirbair wair een nyewe kade te hebben om des wille dat sij den ambocht voirs. luttel scade dede, vercoft hebben Jan Danel z. tot behoef den Gnephoeck [Oudshoorn] ende die nyewe kade, die nu gemaect is streckende twisken den Lagen Waertschen dijck ende ofwegen, beter ende oirbairliker is dan die oude kade voirs. So bekenne ic dair om dat ic van des ambochts wegen voirs. wael voldaen ende betaelt bin vanden kade voirs., ende wes gelt dat vanden voirs. kade gecomen is, dats te weten vijve ende dertic wilhelmusse scilde, dat heb ic voirt verleyt inden oirbair vanden gravinge vanden nyewe kade voirs. gelijck als ic dat te rekeninge begrocht hebbe voir den lantgenoten des ambochts voirs. Ende om dat dit wair is, so heb ic Heynric voirs. van des ambochts wegen van Coudekerck voirs. gebeden Jan Jacop z. onsen scout dat hi desen brief bezegelen wil. Ende ic Jan scout voirs., om bede wil van Heynric van des ambochts wegen voirs. ende bi beveel vanden hogen heemr., so heb ic desen brief bezegelt mit minnen zegele, int jair ons heren duysent vierhondert twee ende veertich.

 

Location, Folio
OAR12, 068r-b-068v
type : Vonnis	date : 1284-11-13	record : # 494
[021] Wij grave Florens van Hollant maken kont allen den genen die desen brief sullen sien of horen lesen dat wij onsen getruuen luden die wonachtich sijn inden ambocht van Alphen, in Randenborch des heren ambocht van Brederoeden, in Snidelwijck heren Dircx ambocht van Sassenem, in Groensvoerde, in Scilant der abdissen gerechte ende in Snidewijck Splinters gerechte wt den wairde gegeven hebn alder gedaen rechte ende alder gedaen vriheit dat sij die duer die leget ter Goude inder sluse opten Rijn wt doen [68v] mogen ende afnemen altois in der manier dat sij mit enen waterkere off mit enen somer dijck tiegens dat somer water bewaren tlant dat leget bij beide zijden vander Goude. Ende die waterkeer sal gaen vanden Rijn up ende strecken also verre als die vier paer hiemraders goetduncket ende den lande oirbair is. Voirt gebieden wij dat die vier scoute van desen voirgenoemden ambochten op die Goude comen mit horen gezworenen den waterkeer te deilen eer ment ane vaet elken rechter tsijn ontfaen margen margens gelijck aldaert ten recht hebn sal, ende elken rechter tsijn te bescouwen mit sinen hiemraders. Voirt willen wij dat die gene die dese brugge te voren makeden voirt ane maken ende bescouwen ende anders nyemant. In oirkonde van deser vryheit ende des rechts so hebn wij desen brief bezegelt mit onsen zegele ende geg. inden Hage inden jare ons heren mcc ende lxxxiiii des manendage na sinte Mather dach.

 

Location, Folio
OAR12, 068v-a
type : Vonnis	date : 1446-10-04	record : # 226
[022] Item eodem die wort gesloten also lange tijt gesceel geweest heeft tusschen dien van Alphen ende die smaeldorpen als Groensvoerde, Randenborch, Snidelwijck ende tvri ambocht van Boschcoep wie die Goutsluyse tot Alphen mit recht sculdich wair te maken ende also men in der wairheit niet en heefft konnen bevijnden na enigen hantvesten, kueren off rechten wie die mit recht sculdich is te maken, so ist dat die selve sluyze in desen jaer gemaect is geweest bij genoech vanden heemr. bij die van Alphen ende dorpen voirsc. ende hebn daer om den cost geleden morgen morgengelijck, ende want zeder die tijt dat die voirsc. sluyze gemaect is geweest die voirsc. heemraden vernomen ende verstaen hebn dat na rechte die smaeldorpen voirsc. zekere verbant inden voirsc. sluyze hebn te maken, te weten an die noortzijde naest der sluyze iiii stijlen ende an die zuutzijde naest der sluyze oec vier stijlen mit dat stemplis, ende dat die van Alphen toebehoirt te maken die scotduer ende dat scotduer gebijnt ende dat ander plaet werck an beiden zijden behoirt toe te maken die gene die die Goude ka sculdich sijn te maken. Ende dat vierkant vander sluyze sel bliven ten laste vanden gene die tweewarver laitste die gemaect hebn, ten sij dat yemant mit beteren rechte hem dair off vrien mach ende een sculdiger wijsen mit rechte.

 

Location, Folio
OAR12, 069r-a
type : Vonnis	date : 1437-02-01	record : # 284
[023] Item ic Aechte Meynert Dirx zs. weedwij doe cont allen luyden die desen brieff zullen sien of horen lezen dat ic mit Lijsbet Jans dochter brengen des briefs gedadingt ende overcomen bin als van alsulken after wesen als ic an hoir hade voerende van quaden lande dair ic grote scade hier voirtijts of gehadt hebbe van hoirre wegen, ende sij ballinge voir geliet was, kenne ende lye dat ic dat lant selve an sel nemen ende houden ende scelde hair dair quijte of also verre als sij mitten bailiuwe ende den wel geboren hiemr. van Rijnlant te vreden kan werden. In kennesse der wairheyt ende ic selve ghenen zegel en hebbe so heb ic gebeden Heinrick Engels z. desen brief voir mi te bezegelen. Ende ic Heinric, om bede willen Aechten voirs., so heb ic desen brief open bezegelt mit mijnen zegel. Dair bij waren twie poorters van Delf als Geerlant Hugen z. ende Jan Willems z., int jair ons heren duysent vierhondert zeven ende dertich op onse vrouwen avont te lichtmisse.

 

Location, Folio
OAR12, 069r-b-070v
type : Vonnis	date : 1356-04-18	record : # 286
[024] Copie vander hantvest van Alphen: 'Willem van Beyeren van Heneg. van Hollant, van Zeelant ende her van Vrieslant maken cont allen luyden dat wij gegeven hebben ende geven voir ons ende voir onsen nacomelingen onsen goeden luyden van Alphen tusschen der Goutsluyse ende den Crommen sloot, onsen goeden luyden van Hazaertswoude tusschen den Crommen sloot ende den Goutsluyse die gelegen is op den Bansloot dair Ketten kinderen lant nu ter tijt up leyt, onsen goeden luyden van Bosscoop op die westzijde vander Goude ende onsen goeden luyden van Waddijnxveen die gelegen sijn tusschen Bosscoep Waddinxveenre ka die gelegen is in Claes Dorrekijns weer eenen gemeenen ende eenen vryen waterganck durende tot weeliken dage, beginnen an den Rijndijck ende eenen ka te leggen ende te behouden op Ketten kinder lant op die oestzijde vanden sloet diemen heet den Bansloet ende voirs. is doirgaende op die Goudwal op die westzijde dicht te houden tot Claes Dorrekijns kade toe ende wt ate gaen inder Yselle onverseit van yemande den Yseldijc op ende toe te doen ende dat te dammen ende dien dam up ende toe te doen also dicke als die sluyse noot hebben ende dat min ende oirbairlic is onsen goeden luyden voirs. Ende desen voirseyden dam sullen scouwen die hiemr. van desen voirseiden waterganc, ende dat te voirsien van desen voirs. hiemr dat ghemeen lant gene scade en crige mit gemeenre morgen van desen voirs. waterganc. Ende den Rijndijck tot een waterkeer ende mit deser voirseider sluyse, so sullen onse goede lude voirs. horen vrien wille doen tot ons gemeens lants oirbair dat nu ter tijt becost dese sluyse ende waterganc voirs. ende horen nacomelingen sonder yemans weder seggen ende nymermeer ander lude doirganc. voirt so sullen dijcke ymer also lange wese dat onsen goede lude waterganc hoir diepe behoirt tot oirbair onser goeder luyden voirs. Ende tot des voirs. waterganc hebben wij onse goede luyde voirs. gegeven ende geven also veel lants als sij behoeven tot der Ysel to up horen cost hoir wateringe ende waterkeringe of te maken ende te houden ende te gelden tot onsen edelen hiemr. seggen, ende dese voirseyde waterganc, waterkeringe ende ka die dair toe behoren wair dat sij gelegen sijn so sullen scouwen die scoute van Alphen die nu is of namels wesen sal mit tween hiemraders van Alphen, mit twien hiemr. van Hazaertswoude mit twien hiemr. van Waddinx veen ende mit eenen hiemr. van Bosscoep. Ende dese voirseide hiemr. so sullen kiesen int ambocht van Alphen die scoute van dien ambocht bijden bueren in dien ambocht ende inden voirseiden waterganc wonen, in Hazaertswoude die scoute van dien ambocht mitten buyren inden waterganc wonen, in Bosscoop die stout van dien ambocht bi den buyren inde waterganc wonen ende in Waddijnx veen so salse kiesen die scout van Poelgen bijden gemeenen buyren van Waddinx veen die in die [65r] waterganc wonen als voirs. is. Ende wes dese voirs. hiemr die dese waterganc voirs., waterkeringe ende ka die dair toe behoren scouwen ende kueren bij horen eede tot ons lants oirbair voirs. dair nyement weder te seggen, ende dese scoute ende hiemr. voirn. zullen scouwen also dicke als him nutte ende oirbair is tot ons lants behoiff voirs. Ende in dese voirs. waterganck so sal gelden elke morgen morgen gelijc sonder yemans weder seggen, ende alle onrecht water buten horen wateringe te keren ende houden wair dat hem deren mach. Ende die van Hazaertswoude sullen houden een ka ende een waterkeringe vanden veen anden Rijndijck opten van die voirs. is op die westzijde, ende voirt sullen die van Hasaertswoude voirs. den Rijndijc dicht houden vanden Bansloot ten Crommensloot toe, ende die van Alphen den Rijncijc dicht houden vanden Crommensloot ter Goudtsluyse toe. Voirt sullen die van Alphen voirseyt een ka ende een waterkeringe huden vander Goutsluyse tot Bosscoop toe. Ende die vanBosscoep sullen van Alphenre ban een ka ende een waterkeringe houden tot Waddinx veen toe. Ende die van Waddinxveeen zullen van Bosscooper ban een ka ende een waterkeringhe houden up die Goude tot an Claes Dorrekens ka toe. Geviel oick dat onser goeder luyden voirs. wateringe or waterkeer van horen wateringe te cleyn woirde, die souden sij meerren mitten naister aerden ende mitter minster schade, ende die aerde sullen onse goede luyden voirs. dan gelden tot hoirre hiemraet seggen. Gheviel oick mede dat onder dese scouten ende hiemr. voirs. enigherhande twij quame wair bij datsij enige scouwe after laten wouden of after lieten dair ons voirseits lants oirbair aenlage, dat soudmen brengen an onsen edelen heemr ende dair bij dien twij te eynden ende ymmer te scouwen. Wairt mede dat yemant visschede in onser goeder luyde sluyse voirs. alsoe dicke ende menichwerven als hij dair inne visschede dair men of betugen mocht mit twien wittachtigen luyden of meer also dicke verbuerde hij jegens ons x pont ende den scout ende heemr voirs. iiii lb., ende van dese iiii ponden voirs. sal die scout hebben x sc. ende elc heemr also veel. Ende want onse menige altois is mit onse heerlicheit te helpen te comen onsen goeden luyden voirs. in allen zaken wair dat zijts noot hebben tot ons lants oirbair ende aengesien hebben groot gebreck ende noot saken die onse goede luyden voirs. aenlagen alse van vreemde watere dair sij bij verderft waren gebleven wair wij hem te hulpe niet gecomen, hier ommee hebben wij onse consent heer toe gedaen. Ende onse goede luyden voirs. dese punten gegeven in alle manieren als voirs. staet sonder enigerhande argelist behouden onser edelen heemr. van Rijnlant ende van Scielant alle hoirs rechts. In oirkonden desen brief bezegelt mit onsen zegel, gegeven in Middelburch des manendages na palmen sonnendach int jair ons heren m ccc lvi. Jussio domini comitis. Per dominum Florentium de Borsalia et dominum H. Popponis.'

 

Go to Folio's ...
000	010	020	030	040	050	061	070	080	090	100	110	120	130

 

Author	Publication	Home
William H. TeBrake Maine, USA, June 2006	Rijnland OAR11, OAR12, OAR13	www.oudleiden.nl

 

Hoogheemraadschap Rijnland OAR 11, 12, 13 : 1253 - 1564
	View: Register OAR 12 Pages 050 - 058

 

Go to Folio's ...
000	010	020	030	040	050	061	070	080	090	100	110	120	130

 

Location, Folio
OAR12, 050r-a
type : Consent	date : 1457-03-01	record : # 442
[116] Item op die selve tijt wort geconsenteert die van Zegwairt als dat zij hoir wege ende wateringe scouwen mogen in alsulken schijn ende op die selve manier als die van Haserswoude hoir weghen ende wateringe scouwen, gedaen sinte Pieters scoue anno lvii.

 

Location, Folio
OAR12, 050r-b
type : Consent	date : 1457-03-01	record : # 443
[117] Item op die selve tijt was die van Benthuysen geconsenteert hoir wegen ende hoir wateringe te scouwen op die selve manier ende in all schijn als die van Hazertswoude doen, gedaen sinte Pieters scouwe anno lvii. [Added, in another hand: 'Dese cuer is off ende te niet ende sulken wort an schouwen op hoir eigende manieren, gedaen optie meye scouwe anno lvii.']

 

Location, Folio
OAR12, 050r-c
type : Consent	date : 1457-03-01	record : # 444
[118] Item op die selve tijt was die smael dorpen geconsenteert also zij plagen te scouwen tot twien scouwen dat zij voort aen mit eenre scouwe doir scouwen sellen mogen ende die scouwe liggen tot sulken tiden vanden jair alst nut is behoudelijc dat sij die in allen kerken xiiii dagen te voren condigen sullen, gedaen sinte Pieters scouwe anno lvii.

 

Location, Folio
OAR12, 050r-d
type : Consent	date : 1457-10-04	record : # 445
[119] Item die hiemraders van Rijnlant hebben optie selve tijt geconsenteert die van Leyderdorp een cade te slaen om die polre lants geheten dat Kerck bou, mit sulker ordinancie als die brieve ende cedulen wtwijsen die onder den voirn. hiemr. leggen geduerende tot des hiemr. weder seggen, gedaen optie bamis scouwe anno lvii.

 

Location, Folio
OAR12, 050r-e
type : Consent	date : 1457-10-04	record : # 446
[120] Item op die selve tijt wort geconsenteert die van Achthoeven in Leyderdorp een huel te liggen inden after dijck geduerende tot des hiemr. weder seggen, gedaen optie bamis scouwe anno lvii.

 

Location, Folio
OAR12, 050r-f-050v
type : Consent	date : 1456-04-06	record : # 447
[121] Item die hoge hyemr. van Rijnlant hebben geconsenteert die van Zoeterwoude dat zij een dam slaen mogen in die wateringe die die van Stompick gemaect hebben vandet Bredweer anden ommedijc overmits dat sij van dat water duer die weteringe commende bescadicht worden ende dat zij horen ommedijc soe dicht maken sullen [50v] datter ghien water duer en come dair yement bij bescadicht mach worden. Gedaen opten sesten dach van aprijl anno xiiii c lvi, ende sel geduyren tot des hyemraets wederseggen. Wij heren Willem van Alkemade, Jan van Noirtich, Jan van Poelgeest ende Dirc van Zwieten gedaen nae die voirs. scouwe anno lvi.

 

Location, Folio
OAR12, 050v-a
type : Consent	date : 1456-05-04	record : # 448
[122] Item so is geconsenteert biden dijcgrave ende hyemr. van Rijnlant dattie brugge open wesen sal gelegen voir die Reynsburger poort besiden den nuwen wech des sullen die regularyssen van Poel ende die broederen van sinte Iheroming mit die gebueren die binnen sitten ende wonen daer een verlaet mogen setten op horen cost overmits dat zij die vairt niet onberen en mogen mer sullen dat verlaet niet winden tot geenre tijt alst water inden Rijn hoger is dan binnen ende dat ymmer also verhoeden dattet lant dair niet bij bescadicht en wort, gedaen optie mey scouwe anno lvi.

 

Location, Folio
OAR12, 050v-b
type : Consent	date : 1458-02-28	record : # 449
[123] Item also wt vervolge van enigen buren van Zoeterwoude geconsenteert was datmen een wateringe gelegen in den voirsc. ambocht een dam over slaen soude also dat die voirsc. wateringe gestopt wesen soude, soe is dair grote clachte of voirden hiemraet gecomen dat dair veel luden bi bescadicht worden ende hebben begeert den dam weder op gedaen te hebben ende die wateringhe horen loop hebben mach, soe is biden hiemraet geconsenteert datmen den voirseyden dam weder op winnen sal ende duynctet yement dat hi dair bij beschadicht wort hi versoeck sijn saek mit recht men sal hem goet recht doen. Dit consent sal duyren tot der hiemrader weder seggen, gedaen anno lviii opten lesten dach van februario.

 

Location, Folio
OAR12, 050v-c
type : Consent	date : 1458-10-03	record : # 450
[124] Item die vander Aer is geconsenteert dat si voirt an scouwen mogen mit vijf hyemrad. dair sij voir dese tijt plagen te scouwen mit seven hiemrad., gedaen anno lviii drie dage in october.

 

Location, Folio
OAR12, 051r-a
type : Consent	date : 1458-10-03	record : # 451
[125] Item die van Eslikerwoude is geconsenteert dat si hoir banwercken scouwen sullen gelijck die van Soeterwoude hoir banwercken scouwen, gedaen anno lviii drie dage in octoberi.

 

Location, Folio
OAR12, 051r-b
type : Consent	date : 1459-06-26	record : # 452
[126] Item dien van Voerscoten is geconsenteert dat zij mit eenre scouwe al duer scouwen sullen mit den ambocht van Voerschoten in sulken manieren ende op sulken bueten alst dien van Hazertswoude geconsenteert is voirtijts ende in des hyemraets boeck gescreven staet, gedaen des dinxd. nae sint Jans dach anno lix.

 

Location, Folio
OAR12, 051r-c
type : Consent	date : 1460-02-26	record : # 453
[127] Item op die selve tijt was overdragen mit Dirc Hoochstraet dat hi die brugge geheten die lage brugge te Waensveen houden sal op sinen cost van airde van houte tot der tijt toe datmen die voirsc. brugge van stilen van nyewes vernuwen moet ende die also houden buten des lants cost ende des sal hi die brugge so hooch maken alst hem gelieft als om turf ende anders doer te voeren, gedaen anno lx op sinte Pieters scouwe.

 

Location, Folio
OAR12, 051r-d
type : Consent	date : 1460-05-06	record : # 454
[128] Item also die dijcgrave ende hyemrade van Rijnlant alle die watermolen binnen horen bedrive of gecuert hebben overmits dat die een sijn water opten anderen werpt, so hebben die van Segwaert den dijcgrave ende hiemraders van Rijnlant te kennen gegeven hoe dat zij watermolens hebben ende mit horen lande dair sij die molens hebben duer Schielant wt wateren ende al ist dat zij binnen den merken van Rijnlant leggen dat zij dair om mit dier keur niet en behoren belast te wesen, hier op hebben die dijcgrave ende hijemraders raet gehadt ende overgewegen dat voirsc. staet ende hebben die van Segwairt die mit horen lande inne Schielant wateren dat zij hoir watermolens mogen gebruyken tot der tijt toe dat bijden dijcgra- [51v] ve ende hyemraders van Rijnlant anders dair in geordineert sel wesen, ghedaen optie meye scouwe anno lx.

 

Location, Folio
OAR12, 051v-a
type : Consent	date : 1461-06-30	record : # 455
[129] Item die hyemr. van Rijnlant hebben geconsenteert Willem Gerijt Diemans z. dat hi die vairts kant in Benthuysen sal mogen duer doen graven ende dair over een gange ligghen over te gaen duerende tot des hiemrad. weder seggen, gedaen op s. Jans scouwe anno lxi.

 

Location, Folio
OAR12, 051v-b
type : Consent	date : 1461-10-13	record : # 456
[130] Item die dijcgrave ende hyemraders van Rijnlant hebben geconsenteert Willem van der Does dat hij neffens sijn hoffstede tot Leyderdorp een stenen brugge xiiii voeten breet inden Rijndijck maken sal mogen ende die houden op sijns selfs cost, gedaen op bamis scouwe anno lxi.

 

Location, Folio
OAR12, 051v-c
type : Consent	date : 1461-10-13	record : # 457
[131] Item die dijcgrave ende hyemrad. van Rijnlant hebben geconsenteert Jan van Zwieten dat hij in die Rynnegommer wateringe een draeyboem leggen mach ende die sluyten om die duervairt te benemmen mits dat hij een ander gat wider ende dieper neffens zijn hofstede van Rynnegom heeft doen graven over die wateringe voirsc. gaende an beiden eynden in die wateringe voirsc., gedaen optie bamis scouwe anno lxi.

 

Location, Folio
OAR12, 051v-d-052r
type : Consent	date : 1461-10-13	record : # 458
[132] Item die dijcgrave ende hyemraders van Rijnlant hebben geconsenteert dien van Coudekerk dat zij mit eenre scouwe scouwen mogen al dat ambocht duer gelijc die van Hazertswoude dat voirtijts geconsenteert is dair die van Coudekerck een scrift [52r] of gelevert is gelijc die van Hazwetswoude dair of hebben, gedaen optie bamis scouwe anno lxi.

 

Location, Folio
OAR12, 052r-a
type : Consent	date : 1462-02-23	record : # 459
[133] Item dijcgrave ende hyemraders van Rijnlant hebben geconsenteert dien van Alphen die mit die van Waddinxveen, mit Hazertswoude ende mit Boscoip in een gemeen wateringe in die Ysel wateren dat zij in horen ambochte molenen setten moghen om hoir water in dien gemenen watergange mit molenen te werpen duerende tot des hyemr. voirsc. wederseggen, gedaen op sinte Pieters scouwe anno lxii.

 

Location, Folio
OAR12, 052r-b
type : Consent	date : 1462-07-06	record : # 460
[134] Item die vander Air ende vander Schoet is geconsenteert dat zij hoir scouwe dage sullen doen condigen in drie die naeste kerken xiiii dagen te voren ende dairop sullen zij voort duer scouwen sonder ander wete te doen, gedaen op sinte Jans scouwe anno lxii.

 

Location, Folio
OAR12, 052r-c
type : Consent	date : 1462-07-06	record : # 461
[135] Item die van Leyderdorp is geconsenteert te scouwen gelijck die van Hazertswoude ende van Zoeterwoude, gedaen op sinte Jans scouwe anno lxii.

 

Location, Folio
OAR12, 052r-d
type : Consent	date : 1462-07-06	record : # 462
[136] Item Florijs van Bosschuysen is geconsenteert den Rijndijck neffens sijnre hofstede to Alphen duer te graven ende een brugge dair in te leggen van hem gemaect behoudelic dat die wateringe duer die brugge gaende after dicht wesen sel so datter ghien water duer die brugge binnen lants comen en sel ende dat die hiemr. voirsc. dat voort sullen doen besien hoemen dat warck maken sal, gedaen op sinte Jans scouwe anno lxii.

 

Location, Folio
OAR12, 052v-a
type : Consent	date : 1462-10-09	record : # 463
[137] Item also up sinte Jans scouwe lestleden enige van Benthuysen die gelant sijn in die Blocklanden een nuwe wateringe begeerden te hebben ende te maken tenden die Blocklanden beghinnende an Gelreswouwer wateringe duer Allairt Mees z. dam streckende an Benthuyser horn dair die wech om comt achte roede voeten wijt ten wair of men dair enige hoofden in maecte die soude men seven voeten wijt maken. Soe sijn enigen nv op dese scouwe gecomen tot Sparnendam ende hebben dair te kennen gegeven datmen dese voirsc. wateringe niet consenteren en sal want sij dair grotelic bij bescadicht souden wesen ende dat sij hoir lant niet en souden moghen gebruyken ende hebben dair om an beyden siden begeert dat die hoge hiemr. dat wouden doen besien van hoir mede gesellen ende den meesten oirbair dair in laten geschien, soe is biden voirsc. hyemrad overdragen dat Jacop van Woude ende Jan van Poelgeest dair sullen treken ende besien wat dair nutste toe gedaen is twelke so gheschiet is biden voirsc. twie hiemraders ende nae goeden onderwijse dat zij dair gevonden hebben soe hebben sij in den naem vanden ghemenen hyemrade also hem dat gemachticht was geconsentiert dat die wateringe voirtganck sel hebben naden begeren ende sij sullen Allairt Miees z. dair op winnen ende dair een hoofde steken dair Allairts dam nv leyt seven roede voeten wijt buten al lants cost tot prise vanden schout ende heemrade van Segwart ende die voirn. schout ende hyemrade sullen dese voirsc. watering scouwen mitten wechsloot tot oirbair des lants ende die oude wateringe desen voirsc. Bloklanden toe behorende sel voort an onbescouwet bliven liggen. Dit consent sel dueren tot der hiemrad weder seggen, gedaen negen dage in october anno lxii.

 

Location, Folio
OAR12, 053r-a
type : Consent	date : 1465-03-12	record : # 464
[138] Item die dijcgrave ende heemraden voirsc. hebben geconsenteert Willem van Lewen dat hi den ouden wech ghelegen tot Voerschoten bij sinte Niclaes huysken ende is gheheten den wech [genaamd den wech door Heere Heijnrics lant en toebehorend aan Zoeterwoude, te mogen gebruiken en er tot opzeggen een hek op te zetten.]

 

Location, Folio
OAR12, 053r-b
type : Consent	date : 1465-03-12	record : # 465
[139] Item den scout ende heemraden van Benthuysen is geconsenteert bijden heemraden van Rijnlant dat si alle hair wateringen binnen Benthuysen ende hair vaerten scouwen moghen alsoe wijt ende also nauwe als oirbair ende nutte wesen sal tot des ghemeens lants behoeff in Benthuysen ende dat bij horen ede.

 

Location, Folio
OAR12, 053r-c
type : Consent	date : 1465-07-23	record : # 466
[140] Item opten xxiii dach in julio anno lxv sijn die heemraden van Rijnlant vergadert gheweest tot Leyden ende hebben gheconsenteert dien van Snijdelwijc, Poelgen ende van Groensvoirt dat sy een scouwe leggen sullen moghen op die Back wateringe ende die scouwen tot des lants oirbair, ghedaen anno lxv op sinte Jans scouwe.

 

Location, Folio
OAR12, 053r-d-053v
type : Consent	date : 1465-07-23	record : # 467
[141] Item voirt is den selven gheconsenteert die streck vaerten ghelegen tusschen Alphenre vaert ende die Back wateringe die te scouwen mede tot nutscap ende profijt des ghemeens lands ende dese dwers vaert salmen beghinnen te maken tot in die Backweteringe ende tot in Alphenre vaert toe ende dair toe een tijdtwech een roede breet langhes die dwers [53v] vaert an die oostzide van die dwers vaert, gedaen optie voirsc. scouwe.

 

Location, Folio
OAR12, 053v-a
type : Consent	date : 1465-10-08	record : # 468
[142] Item die heemraden hebben geconsenteert Jan die Backer dat hij sulc lant als hi leggen heeft an die Goude kade in Randenb. sal al omme bekaden ende dat ghedaen wesende sal hi mogen leggen een huelkijn duer die Goude kade om water dair in mede in te laten duer die huele uter Goude op sijn lant sonder mit dien water yemant te besceydingen ende wairt dat hi yemant dair mede bescadichde dien soude sal hi ghelden bijden heemrad.

 

Location, Folio
OAR12, 053v-b
type : Consent	date : 1466-05-06	record : # 469
[143] Item die dijcgrave ende heemrad van Rijnlant hebben gheconsenteert Willem van Foreest dat hij mit sinen scout van sinen ambocht van Middelb. sal hebben twe scouwen in sinen voirsc. ambocht, die een in die meye ende die ander tot bamisse om te scouwen tot des ambochts voirsc. oirbair ende profijt.

 

Location, Folio
OAR12, 053v-c
type : Consent	date : 1466-05-06	record : # 470
[144] Item die dijcgrave ende heemrade van Rijnlant hebben gheconsenteert Claes van Hairlem een gat te delven bij sijn huys doer die kade diemen gaet opten Hogen veen ende sal dair maken twe hoofdens mit bomen ende leenen dat dair nymant by bescadicht en wort noch clachte over coomt duerende tot der heemrade wederseggen, gedaen opte meye scouwe anno lxvi.

 

Location, Folio
OAR12, 054r-a
type : Consent	date : 1468-02-23	record : # 471
[145] Item het is geconsenteert Willem Onderwater met sijn kinderen, Jacob Vrancke z. mit sijn mede ghesellen een gat te mogen maken duer den ommedijc met een scotduer te houden buten den bueren kost duerende tot der heemraden weder seggen.

 

Location, Folio
OAR12, 054r-b
type : Consent	date : 1468-05-03	record : # 472
[146] Item die dijcgrave ende heemrade hebben gheconsenteert den ambocht bewaerer van der Schoot dat hi dat morgen gelt vanden ambocht sal mogen mit rechte in winnen mit den dagelicxen recht van den ambocht gelijc of hijt dede mit des dijcgraven ende heemraden bode durende tot horen weder seggen.

 

Location, Folio
OAR12, 054r-c
type : Consent	date : 1468-06-28	record : # 473
[147] Item dien van Soeterwoude is geconsenteert een gat te delven duer den ommedijck die leecht tusschen Vranck Mees z. ende Jan Aelwijns s. ende een brugge dair in te leggen ende te houden, gedaen op sinte Pieters ende Pouwels avont anno lxviii.

 

Location, Folio
OAR12, 054r-d-054v
type : Consent	date : 1469-02-28	record : # 474
[148] Item alsoe voertijts bijden heemraden van Rijnlant een kuere ghemaect is gheweest dat nyemant mit parde moelen noch ander moelen in Rijnlant malen en souden, soe hebben die dijcgrave ende heemraders geconsenteert datmen mit parde molens twater uten lande sal moghen [54v] malen inden Rijn, in die Zijl off elck in sijns selfs wateringe duerende tot horen wedersegghen, ghedaen op sinte Pieters scouwe, anno lxix.

 

Location, Folio
OAR12, 054v-a
type : Consent	date : 1469-06-27	record : # 475
[149] Item gheconsenteert den inghelanden van Benthuysen een vaert te maken achte voeten wijt ende die hoefden diest dair in maken sullen sellen wesen seven voeten wijt beghinende an die costers huys tot in die Heemsloot, ende dese vaert sullen maken elcx neffens sijn lant, ende sellen bescouwen die scout ende heemraden van Benthuysen als sy andere wege ende wateringe scouwen duerende tot die heemrader weder seggen, gedaen op sinte Jans scouwe anno lxix.

 

Location, Folio
OAR12, 054v-b
type : Consent	date : 1469-10-03	record : # 476
[150] Item die heemraders hebben gheconsenteert Dirc Dircx z. van Beest dat hi sulck lant als hi leggende heeft in die ambocht van Zuijtwijck ghehieten Splinters voet op die Gou kade sal omme bekaden ende dat ghedaen wesende sal hi moghen legghen een huelkijn doer die Goude kade om water daer in mede ende wt te laten duer die huele uter Goude op sijn lant sonder mit dien water yemant te beschadigen ende wair yemant die hi dair mede beschadichtde dien scade soude hi beteren bijder heemraet duerende tot der heemrade weder seggen, gedaen opte bamis scouwe anno lxix.

 

Location, Folio
OAR12, 055r-a
type : Consent	date : 1469-10-03	record : # 477
[151] Item dit selve ende des ghelijcx is geconsenteert Jan die Backer xv morgen lands omme te bekaden gelegen naest Dirc Dircx z. voirsc. sijn lant in alre manieren als voirsc. is, ghedaen op die bamis scouwe anno lxix.

 

Location, Folio
OAR12, 055r-b
type : Consent	date : 1471-05-07	record : # 478
[152] Item die dijcgrave ende heemraders hebben gheconsenteert heren Gerijt Symons z. een huele te leggen int ambocht van Leyderdorp inden Rijndijc behoudelijc dat hi sijn lant after dicht houden sal, ghedaen op die meye scouwe anno lxxi.

 

Location, Folio
OAR12, 055r-c
type : Consent	date : 1471-10-08	record : # 479
[153] Item soe wort geconsenteert den scout ende heemrade van Lisse dat sy die beeck die leyt onder Pouwels Dammes z. scouwen ende maken sellen ende die wt delven sellen tot opten ouden bodem, beghinnende vander hoel die leyt besyen den huyse van Pouwels voirsc. tot in die meer op die boeten van ix sc., gedaen op die bamis scouwe anno lxxi.

 

Location, Folio
OAR12, 055r-d
type : Consent	date : 1472-03-03	record : # 480
[154] Item soe is geconsenteert Jan Aelwijns ende Gerijt Vechters z. een hoel te leggen doer de wech die men gaat van de kerk tot de noortdae [added in the margin: 'inder ambacht van Zoeterwoude'] welke hoel sy houden sullen buyten yemant in coste ende in schade duerende totter heemraden weder seggen, gedaen op die meye scouwe anno lxxi.

 

Location, Folio
OAR12, 055r-e
type : Consent	date : 1472-05-05	record : # 481
[155] Item soe is geconsenteert Jan Claes Dircx z. een gat te delven in den banwech in dat westeynde byder helfwech inder ambocht van Zoeterwoude, welc gat hi sel maken mit twee hoefden an beyden siden dair hi horden ende boemen over houden leggen sal datmen dair altijt over mach sonder yements cost ende yement dair bij te beschadigen duerende totter heemrader weder seggen, gedaen op die mey scouwe anno lxxii.

 

Location, Folio
OAR12, 055v-a
type : Consent	date : 1472-05-05	record : # 482
[156] Item soe is geconsenteert die van Voirscoten twee stenen bruggen te maken over die wateringe in die Papenwech ende die te maken also wijt ende also hoech datmen dair doer varen mach mit een aelman geladen mit turff ende hout duerende tot der hyemraden weder seggen, gedaen op die mey scouwe anno lxxii.

 

Location, Folio
OAR12, 055v-b
type : Consent	date : 1472-05-05	record : # 483
[157] Item die dijcgrave ende heemrade hebben geconsenteert die van Catwijck opten Rijn dat sy een heck mogen setten in Sevenhuysen upten wech in die Cromme by luttick geest datmen vp ende toe doen mach sonder slot dair an te hangen, duerende totter hyemrad weder seggen.

 

Location, Folio
OAR12, 055v-c
type : Consent	date : 1472-06-30	record : # 484
[158] Item is geconsenteert die van Wassenair een stenen brugge te maken over die wateringe in die Papenwech inden ambocht van Wassenair neffens die hofstede van Zanthorst in sulke borge ende manieren als dat den ambocht van Voirscoten geconsenteert is.

 

Location, Folio
OAR12, 055v-d
type : Consent	date : 1472-10-06	record : # 485
[159] Item Pieter Willems z. is geconsenteert dat hi sulke renten als hi heeft behorende Costverloren vercopen mach ende weder beleggen an een stuck ten mynsten also veel as die renten nv dragen of waert zijn ende dat die vercofte renten meer dregen dat sal hi ooc belegen alsoe dat alle die gelden beleit sullen wesen hier of salmen Pieter enen nuwen brief geven.

 

Location, Folio
OAR12, 055v-e
type : Consent	date : 1473-07-20	record : # 486
[160] Item die dijcgrave ende heemraden hebben geconsenteert Willem Symons z. ende zijnen zonen dat zij een brugge leggen mogen doer den wout wech ende die houden vp horen cost om dair doer te voeren, duerende tot ter heemrad weder seggen.

 

Location, Folio
OAR12, 056r-a
type : Consent	date : 1474-05-10	record : # 487
[161] Item die van Alfen is geconsenteert die binnen der nuwer kade gelegen sijn dat zij een watermolen setten mogen binnen horen lande dair sy dat water mede inden Rijn werpen mogen behoudelic dat die nuwe kade dicht sal wesen dat dair geen water vten watering duer camen en sel, dit consent sal dueren totter heemrad weder seggen, gedaen op die mey schouwe anno lxxiiii.

 

Location, Folio
OAR12, 056r-b
type : Consent	date : 1474-06-28	record : # 488
[162] Item is geconsenteert Govert Pieters also op Sparendam drie huysen verbrant waren die seer cleyn waren ende die geen dair den brant of quam ter stont daer nae een ander huys opten voirsc. dam coste dat Govert voirsc. mit hem anderden dat heel erff betymmeren sal mogen behoudelic dat tuschen beyden een goed redelike stege sal bliven leggen om die te gebruycken.

 

Location, Folio
OAR12, 056r-c
type : Consent	date : 1480-05-09	record : # 489
[163] Item soe is geconsenteert bijden dijckgrave ende den hogen heemrade van Rijnlant int jair xiiii c ende lxxix op die mey scouwe, den kerckmeesters van Hillegom een slote te mogen doen delven ses voete wijt in hair lant leggende op die meer durende tot des heemraets weder seggen.

 

Location, Folio
OAR12, 056r-d
type : Consent	date : 1482-07-02	record : # 490
[164] Item op sinte Jans scouwe anno lxxxii so is consenteert bijden dijckgrave ende den hogen heemraet den lage heemraet van Hillegom ende van Lis also sij plagen te scouwen op hair eygen buydel dat sij nv voirt an sullen hebben tot drien scouwen tsjairs elcke scouwe een pont payments ende dat altijt tot des heemraets van Rijnlants wederseggen.

 

Location, Folio
OAR12, 056v-a
type : Consent	date : 1483-03-04	record : # 491
[165] Item so is geconsenteert bijden dijckgrave ende den hogen heemraet anno lxxxiii op sinte Pieters scouwe Willem Heynricx z., Pieter Dircx z., Wouter Jans z., Claes Jans z., dat zij malen sullen mit die nyewen water molen int ambocht van Hasertswoude tot des heemraets weder seggen toe.

 

Location, Folio
OAR12, 056v-b
type : Consent	date : 1483-07-15	record : # 492
[166] Item op sinte Jans scouwe anno lxxxiii so worde consenteert bijden hogen heemraet van Rijnlant dat onder die heerlicheit van heer Heynric van Naeldwijck inden ambocht van Waensveen mogen malen hair water mit den Woude die te voeren mit paerden plegen hair water te malen ende dat sal duyren tot onse weder seggen.

 

Location, Folio
OAR12, 057r-a-057v
type : Vonnis	date : 1399-08-30	record : # 041
[001] Aelbrecht biden genaden goeds paelensgrave opten Rijn hertoge in Beyeren doen kond allen luyden dat wij om voirsoecs wille van onsen lieven ende getruwen den heer van Egmondt ende Yselsteyn heren Jan die Bastert van Baloys ende zommighe anderen van onsen vrienden geboden ende bevolen hebben onsen wel geboren hiemr. van Rijnlant dat sij om gemeen oirbair gewijst ende gekoiren hebben dat die wilde veen die gelegen is after Haeserswoude ende onsen ambocht vanden Berthorn wateren zullen in die [21v] wateringe van Benthuysen doir onsen ambocht van Hasertswoude tot inden Rijn. Ende dese waterscip zullen maken alle die gene die gelant sien inden ambocht voirs. ende in de Berthorn morgen morgens gelijc. Ende men salse bescouwen ende hoefslagen mitten rechten ende dagelixen hiemr van Benthuysen. Ende so wat koiren dese voirs. hiemr. hier up koiren zullen het sie van brugge te maken, van spooyen, van slusen off van enich ander dingen dat oirbair in brengen mach dat sel gehouden werden sonder enich weder spreken. Ende is dat sake dat sij yemant dair overherich in vinden, die sal voldoen dair off alsmen van slusen, van wateringen plach te doen ende aldair custumelic is. Ende en deden sij des niet,so en sal die rechter voirs. gelt wyt leggen ende weder vanden onwilligen up bueren twe scat an gelde ende vier scat an pand. Ende dat sal die rechter voirs. machtich wesen te panden mitten hiemraet an hoir goet off anden veen off in die Berthorn dier gelijc off an zullic goet als vanden lande coemt binnen der waterscip voirs. Voirt want inden veen voirs. mitten eynde tot Waddinxveen wart strekende alrehande luyde gelant sijn die geen waterscip en begeren noch geenen cost dair aen geleyt hebben, die luyden en zullen in desen voirs. waterganc niet comen ten sij dat sij dair off voldoen hebben den genen die voir hem gelant sijn ende den voircost wyt geleyt hebben. Voirt zullen alle die gene die gelant sijn inden ambocht van Benthusen dese wateringe ende waterscip mede gebruycken het sij met opvaren ende wtvaren gelijc den gene die houden ende maken zullen zonder weder seggen van yemant. Ende tot wat tijden dese gene die besitters sijn off werden zullen van desen veen voirsc. dese wateringe niet langer bruycken en willen, so mogen sij vanden banwerck voirs. ontslagen wesen. Ende so zullen die buyeren van Benthusen die weder an nemen ende vreliken gebruycken ende houden all dinc sonder argelijst. In kennisse des brieve bezegelt mit onsen zegelen. Gegeven inden Hage des saterdages na sinte Jans dach decollatio int jair ons heren dusent driehondert ende negenentnegentich.

 

Location, Folio
OAR12, 057v-a-058v
type : Vonnis	date : 1430-01-13	record : # 042
[002] Wij Gillijs van Cralinge ende van Voirscoten, Gerijt van Poelgeest heer van Hoechmade, Gerijt van Zijl heer van Purmerende ridderen, Boudijn van Zwyeten trezerier van Holland, Jan vanden Boechorst van Nortich heer van Noirtigerhout, Meynert Claes z. ende Florijs Paedze hoge hyemraden van Rijnlant doen kond ende kenlic allen luyden dat in tijden voirleden bij rade ende goet duncken ende concente der goeder setde van Harlem ende des gemenen lands van Rijnlant gecomen sien upten dijck tot Sparendamme heer Gillijs van Cralinge ridder voirs., Adriaen van Raephorst, Jacob vanden Woude, Harper van Freest, Willem van Zaenden, Gerijt van Buschusen ende Heynric Hermans z. hoge hiemraderen van Rijnlant up die tijd aldair in eenre inlage bij ongeval van water der kercken dijck van Sparenwoude zeer gebroken ende verplaecht was also dat sij samentliken bij rade ende goduncken der goede stede van Harlem ende den gemenen lande van Rijnlant voirs. om zonderlingelast ende noots will, die den gemenen lande van Rijnlant voirs. dair an gelegen was, deden bieden ende kundigen off dair ymant wair die der voirgen. kerken dijck om der voirs. kerken wille om een redelic loon [in left margin of OAR12 is added 'woude'] an nemen te maken ende tot sijn volmacten dijcke weder upbrengen en volmaken woude. Desser nyement en quam die dat an nemen off hem onderwinden wouden, also dat sij doe om des groten lasts wille dien sij bekenden datter den gemenen lande van Rijnlant voirs. aen gelegen was zeer dair mede belast ende begangen waren hoe dat sij den selve dijck voirtbrengen ende volmaken soude, des heer Jan Allerts z. priester, uptietijt vicecureyt tot Sparenwoude voirs., aensach ende merchede dat sij dair zeer mede begangen waren merckte aensach oic die groten last mede des dijcks ende grote vrese des gemenen lande van Rijnland voirs. ende van Sparenwoude, ende namden selven dijck mitt sinen vrienden ende magen an weder te maken ende voirt te brengen tot sinen volmaecten dijck vijftien roeden ende een voet lang. Aldair die voirgen. hiemraden up die tijt waren him van elker roede gelooft ende toe geseyt hebben seven nobele, ende doe heer Jan voirs. den voirgen. dijck met sinen magen ende vrienden aldus an ghenomen [22v] ende oic verborght hadde te volmaken die roede om zeven nobele voirs., doe namen die voirgen. hiemraderen hoir beraet ende hoir bezuec noch xiiii dage lang ende ondersochten dair en binnen heymelic ende openbair off sij yemant hadden mogen vinden die hem dien voirgen. kerken dijck hadde willen onderwinden off dat sien mijn hadde mogen besteden te volmaken. Ende want sij nyement en vernamen noch en vonden, soe moste heer Jan voirgen. mit sinen magen ende vrienden der voirs. dijck dijken ende ten vollen dijck volmaken elke roede om zeven nobele voirs. die wij bekennen dat him noch alinge ende al gebrecken na inhout der heemraderen beloften voirs., ende mede na inhout der zevenen gelijcken dat punte vander dijckaedzen inder zelver zevenen begrepen inhout dat een ygelic sijn wtleyden gelt weder eenscat hebben ende ontfangen sel. Voirt so bekennen wij mit des selve brieve dat heren Jan voirgen. noch inder selver dijckaedzen aen alrehanden stucken ende oncosten die hier voir niet geruert en sien veel gelts wt geleyt ende scaden gehat heeft die wij houden tot onser verclaring. Ende overmidts dat der kerken lant van Sparenwoude voirs. dijchout ende dijcksrecht plegen moste, ende mede om dat wij inder wairheyt wel vernomen ende verstaen hebben dat alle dese voirs. punten bijden hogen hiemraderen voirgen. mitten dijckgrave ende bij concente, raet ende goetduncken der goeder stede van Harlem ende des gemenen lands van Rijnland voirs. mitten dijckrecht gansseliken ende volcomeliken gesciet sijn, so hebben wij hogen hiemraderes voirs. samelic mit onsen dijckgrave ende bij raded ende concente der goedere stede van Harlem ende den gemenen lande van Rijnlant voirs. heren Jan Aelaerts z. priester voirgen. mit volcomen dijckrecht in hande geset alle der kerken dijclande voirs. te besitten ende te gebruken ter tijt toe duyerende dat hij van siner wtgeleyde gelde dat hem gelooft was ende mede na inhout der zuenen voirs. wel voldaen ende betaelt is, den lesten penning mitten errsten. In oirkonde desen brieve bezegelt mit onsen zegelen hier an gehangen. Gegeven des vridages na sinte Lucien dach int jair ons heren dusent vierhondert ende dertich.

 

Location, Folio
OAR12, 058v-a-061v
type : Vonnis	date : 1433-00-00	record : # 043
[003] Item so gebuerde tot eenre tijt dat die stede van Harlem horen gewairden bode alse Florijs Bol seynden tot Leyden bider hiemr. van Rijnlant die den hiemr. te kennen gaff, hoe die van Aemsterdam den ommedijck van Rijnlant doer hadden gesteken ende hair sacwollen doirgevoirt, ende dat sij die palen die die hiemr. in die waterscap hadden doen steken up hadden gehaelt, ende enen overslach hadden gemaect over den ommedijck, ende begeerde vander stede wegen van Harlem voirs. so sij mede dair onder beduufden dat hem die hiemr. voirs. dat onrecht woude aff nemen ende berechten bijden eede die sij den lande van Rijnlant gedaen hebben. Deden sij des niet sij wouden des over hem belclagen dair sijt sculdic waren te clagen. Dit aldus die hiemr. voirsc. horende, senden sij ter stont horen gezworen clerck ende bode upten ommedijck ende palinge voirs. ende vonden dat sij den ommedijck doir gedaen hadden ende weder to gedaen ende helt doe ter tijt een voet waters, ende veel sacwollen dair doergevoert ende die palen up getogen, des doe die clerck ende bode voirs. voirt togen tot Aemsterdam van des hiemr. wegen anden gerechte van Amsterdam om te weten vander stede van Amsterdam off dat bij hare bevele gesciet wair. Des doe die clerck ende bode enen dach besceyden wort des anderen dages voir middage upter stede huus so sij begeert hadden mitter stede te spreken vanden voirs. saken. Ende des quamen die clerck ende bode upter stede huus voir tgerecht ende vroescap die dair op die tijt saten ende seyden dat sij dair gesent waren om van hem te weten off sij bevolen hadden den ommedijck duer te steken ende voirt dair duer te voeren hoir velle ende die palen op te trecken. Des worden die clerc ende bode off hieten gaen sij wouden hem beraden, ende doe riepen sise weder up ende dair sat Jan Heynnen z. mitten gerecht ende mitter vroescap ende hilt horen alre woirden ende seyde, 'Den dam heeft onse stede selve aldair doen maken, wair om en souden wij die niet op doen ende toe doen alst ons genoecht om onse goede aldair doer te voeren, mar van die palen op te halen, dat is buuten ons gesciet.' Doe andwoirde die clerck ende seyde 'So wil ic die hiemr. seggen van uwen wegen dat dat duerstecken ende duervairt bij concent van uwer stede geschiet is.' Ende dair andwoirde Jan Heynen z. weder aldus: 'Uptien dam [23v] duer te stecken ende die duervairt, dat hadden sij horen poirters geoerloft ende dat stonden sij hem, mer van die palen up te halen, dat wair buyten haren wegen ende sij en bewonden hem des niet die dijcgrave ende hiemr. sochtent ende rechten an den genen die dat ghedaen hadden.' Die dijcgrave aldus verhoorende is gecomen mit recht bijden hogen hiemr. ende heeft hier off een recht an geleit upten vier burgermeesters als voechden der stede van Amsterdam hem aenseggende mit dingtalen mit drien aen spraken, dat sij voir hem zelven ende voir horen mede poorteren ende seyde in sijn eerste aenspraeck dat sij den ommedijck duergesteken hadden ende dat vreemde water in gelaten hadden ende duervaert gemaect hadden buten oirloff vanden voirs. hiemr. ende zeyden dat sij dair an verbuert hadden elx eygen die hoechste boeten off also veel as die hyemr. wijsden dat recht wair, ende des boot hij hem der hiemrad. kenninge. Ende die ander aenspraeck was die de dijcgrave dede voir den hiemr. dat sij een overslach maecten aldair upten voirsc. ommedijck doir die waterscap van Rijnlant buuten oirlof ende concent vanden hiemr. ende zeyde dat sij dair an verboirt hadden sij ende hair mede poirteren elcx eygen die hoechste boeten off wes die hiemr. wijsden dat recht wair ende des boot hij hem die hiemr. kenningen. Ende die derde aenspraeck die de dijckgrave voirs. dede was aldus dat sij ende hoir mede poirten die palen up getogen hadden die de hiemr. hadden doen steken in des lands waterscap buuten oirloff ende concent vanden hiemr. ende zeyde dat sij dair an verbuert hadden voir hem ende voir horen mede poerteren van elke eygen die hoichste boete off wes die hiemraet dair of wijsden dat recht wair ende des boot hij hem die hiemraden kenningen. Dair op dien tijt quamen die burgermeesters van Aemsterdam ten vrienden dage mit Ruuys Jacob z., dair Ruuys up die tijt geerde of hij verandwoirden mochte voir die burgermeesters van Aemsterdam sonder begrijp van boeten, dair him off gewijst wort dat hijt wel doen mocht also verre alst hem die burgermeesters stonden die up die tijt ja zeyden. Ende dair andwoirde hij van der stede wegen dat sij dair niet sculdich en waren te andwoirde te staen ende des ontsculdich waren na wt [24r] wysinge deser na gescreven cedul, ende dair up gingen sij ander hiemrade kenningen gelijc hem die dijckgrave boot. Dit is der poirtmeesteren andwoird van Aemsterdam tegens den dijcgrave des hogen hyemr. van Rijnlant ende seggen dat sij des alingen onsculdich sijn van alle der aentichte die hem die dijcgrave betyet in sijnre aensprake bij reden, want sij horen poirteren niet gehieten noch geoirloft en hebben die slusen up te doen twater wten Ye in te laten lopen dat oick niet gesciet en is noch vanden poirteren geconsenteert, ende en hebben oick niet gehieten den dam anden Heiligen wech doir te steken noch enich palen dair up te halen om enich goet dair duer to voeren of over den voirs. dam te slepen, mer dair is van outs een overtocht geweest, als den goeden steden van Delft, Leyden ende menich goet coepman wel weten, ende off dair enich goede meer over getogen waren buten concent der poirtmeesteren voirs. dair hadde hem die noot toe ghedrongen, want die stede van Harlem ons liefs genadich heren ende vrouwen stroom den poirteren van Aemsterdam voir Sloten, hoe wel die voirs. dam dair eertijts geleyt is bij oirlof ende concent des hogen hiemr. ende oic becosticht vanden poirters van Aemsterdam. Oyc so en is die voirsc. dam geen ommedijck ende die hemrade en hebben dair sluse, dijck, dam, lant noch wateren, ende die voirs. dam is dair doen leggen om dat twater der poirteren lant van Aemsterdam niet belopen en soude, ende die dam dair des dijckgrave aenspraeck off ruert is buuten des dijckgrave ende hogen hiemr. bedrive gelegen dair die dijckgrave mitten hogen hiemr. geen bewijn en hebben noch nye en hadden ende oick nye gezien noch gehoirt en is bij mants leven off bij lants leger noch bij onsen ouderen tijden dair men off weet te seggen, dat yeenich poirter van Amsterdam aldus aen getaest oft gemoeyt wort van enich dijcgrave voirs. of hiemr., ende willen des hair onsculde doen als recht is, ende seggen dat sij mit recht tot haren onsculde comen zullen also sij staen up enen vrien bodem ende onverwilcoirt, ende die dijcgrave voirsc. scepen noch scepen tuuch op hem en heeft ende zeggen dat hem die dijcgrave mit recht niet sculdich en is te verwinnen of mit enich [24v] tuge over te gaen dan mit scepen tuych. Ende also dese voirs. dam der voirgen. stede poirteren van Aemsterdam toe behoirt ende oyck niet gelegen en is binnen den mercken of scouwen van Sparendam, so seggen die voirsc. poirtmeestern dat sij dair off voirden dijckgrave voirs. mogelic tot genen recht staen en zullen, want die dijcgrave noch hiemr. geen bewint sculdich en sien te hebben noch nye en hadden. Voirt seggen die poirtmeesteren noch hier en boven dat sij noch hoir poirteren voirden dijcgrave noch voirden hyemr. niet sculdich en sien te recht te staen bij deser reden, want die stede Amsterdam goede hantvesten vander grafelicheyt van Hollant heeft die hem van onsen geduchten here van Boirgonen ende van onser genadige vrouwen van Hollant geconfirmeert sijn, welke hantvesten begrijpen: Eerst in enen punt datmen genen poirter van Amsterdam noch sijn goet bezetten en mach voir scade off voir scoude onverwilcoirt binnenden Masen wtgenomen in vrien steden, ende so wair der poirteren goet gelegen is, dat en sel nergent ongelt geven dan binnen Amsterdam dan dijc, dam, wech, wateringe ende sluusgelt of dier gelijc. Ende des plechtmen enen ygeliken poirter een weet te doen te comen off te zenden inden ban dair sijn goet gelegen is, ende dair plech die stede ende die andere hoir mede poirteren vrij ende onbecommert of te wesen. Item noch een ander hantveste houdende in enen punte datmen genen poirter van Aemsterdam en sal noch en mach besetten, becommeren noch aenspreken nergent inder grafelicheyt lande bynoorden der Mase van enich broecken dan binnen der stede van Amsterdam ende die bruecken binnen der stede van Aemsterdam te berechten ende dair te eynden na vonnisse der scepenen. Ten wair datmen bevonde vechtenderhant off mit diefliken goede drivende off dragene, off dat hij brueckede in enigen vanden drien steden gelijc die poirtmeesters voirs. dat wel bewijsen mogen. Ende is dat sake dat die dijcgrave ende hoge hiemr. voirs. hem vermeeten ouder hantvesten te hebben, so seggen die poirtmeesters dat dat der stede mit recht niet tegens dragen en mach want die broeken ende boeten onser genadigen here van Borgonen ende onser [25r] genadigen vrouwen van Hollant aen gaen ende onse genadige here ende vrouwe voirn. noch mogende sijn hantvesten te geven den genen die sijts gunnen vander horen ende sij oyck also mogende sijn ende also goet recht hebben binnen der stede van Aemsterdam als dair buten ende also die grafelicheyt der stede mit goeder hanvesten over gegeven heeft aldair te berechten datter mogelijc nyement verder in te zeggen en heeft. Voirt so seggen die poirtmeesters dat sij also goet recht hebben vander stede wegen te antwoirden voir horen poirteren als een wairs man van enen doerp die voir die gemeen buyr antwoirt ende die voir staet up eenre boet ende zeggen al wairt sake datter boeten verbuert waren dat sij voir horen poirteren andwoirden mogen ende die voirstaen met gesamender hant up een boet also wel als een wairsman van sinen buyren doen mach ende andwoirden dair mede behoudelic der stede van Aemsterdam hoir hanvesten. Item hier up antwoirde die dijcgrave ende zeyde dat alle dese voirs. punten ende antwoirden van die van Aemsterdam hem an sinen recht niet dienen en souden want die hiemraders hantvesten ouder sijn dan die hantvesten van Aemsterdam ende dat den voirn. dam ende ommedijck ende waterganc gelegen is indie waterscap van Rijnlant ende dat sijt sculdich sijn te beteren na wtwijsinge der hantvesten ende vonnesse des hiemr. 'Item so alle rechtdage ende steden dair of ten vtersten dage gecomen sijn ende wij hiemr. van Rijnlant vermaent sijn vanden dijckgrave van mijns genadichs heren wegen die kenningen te uten so sij ten utersten dage gecomen sijn als voirs. is, so hebben wij die kenningen gewtet ende wt spreken in alre manieren hier na gesc. Eerst so die dijckgrave van mijns heren wegen die van Aemsterdam toe sprect dat sij den ommedijck mit craft doir gesteken hebben, ende Jan Heynen z. in yegenwoirdicheyt sommegen van gerecht ende vroescap vpter stede huus van Amsterdam van hore stede wege geseyt ende geliet heeft voir onsen gezworen clerck ende gezworen bode die wij dair om aldair gesent hadden dat dat voirs. doirstecken bij horen concent gesciet is ende die van Aemsterdam [25v] die doirvairt zelve voir ons gelijt hebben, so geven wij dair om den dijcgrave die keninge gewonnen ende die van Aemsterdam verloren. Ende also dit mit craft gesciet is, so zullen sij na des dijckgraven aenspraeck dair voir geven voir hem ende voir horen poirteren een hoge boete. Ende also die dam na hoir selfs verlyen duergesteken is bij horen goetduncken, so zullen zij dair voir geven voir die gene die dat gedaen hebben ses die hoechste boeten. Ende voir all die gene die tot kennesse der hiemr. hoir goet gevoirt hebben doen voeren duerden ommedijck voirs., dair zullen die voirs. stede voir geven voir elken man x lb. Item die ander aensprake die die dijkgrave doet vanden overslaen wijsen wij want die burgermeester van Aemsterdam voir ons geseyt heeft dat hij sijn sacken dair over geslagen heeft, so geven wij den dijcgrave die kenningen gewonnen ende die van Aemsterdam verloren, ende dat die burgermeester dair an verbuert heeft x lb. ende desgelijc alle die gene die tot kennisse der hiemraden dair over geslagen hebben die zullen ellix geven x lb. Item die derde aensprake die den dijckgrave doet up die van Aemsterdam is dat sij die palen die staken inden waterganc geheten Costverloren mit craft wtgetogen zouden hebben buten oirlof vanden hiemr. ende want die dijcgrave dat niet bij gebracht en heeft als hij hem vermeten heeft, soe geven wij den dijcgrave die kenning verloren ende die van Aemsterdam gewonnen in manieren hier na gesc., dat is te weten soe wie ter kennisse vander hiemr. dair in betuucht wort, die sel dair voir geven also alst mit cracht gesciet is elx die hoechste boeten.'

 

Go to Folio's ...
000	010	020	030	040	050	061	070	080	090	100	110	120	130

 

Author	Publication	Home
William H. TeBrake Maine, USA, June 2006	Rijnland OAR11, OAR12, OAR13	www.oudleiden.nl

 

Hoogheemraadschap Rijnland OAR 11, 12, 13 : 1253 - 1564
	View: Register OAR 12 Pages 040 - 049

 

Go to Folio's ...
000	010	020	030	040	050	061	070	080	090	100	110	120	130

 

Location, Folio
OAR12, 040r-a
type : Consent	date : 1440-10-04	record : # 145
[011] Anno xl tot Bamisse. Item die heemr. hebben consenteert die van Leyderdorp dat sij hoir kadijc sullen verhueren bij drie of vier manne die sij samentlijck dair toe kiesen ende die sullen den dijck doen maken also hij hun nutte dunct wesen, ende dien onkost sullen sij eens des jairs rekenen op den genen die dair onder bescutt sijn bijden scout, heemr. ende buer. Dit sel geduren tot onsen wederseggen.

 

Location, Folio
OAR12, 040r-b
type : Consent	date : 1441-06-28	record : # 150
[012] Item Bosch Jans z. consenteert wt sijn lant in Zoeterwoude te delven drie dage des jairs dair voir in handen geset dat quade lant an te verhalen inden selven ambocht xiiii hont lants gelegen op ten Vliet an Bolgher wout.

 

Location, Folio
OAR12, 040r-c
type : Consent	date : 1444-03-04	record : # 182
[013] Upten vierden dach in mairte anno xliiii. Item doe waren vergadert tot Leyden Poelgeest, Alcmade, Boechorst, Zwieten ende Paedze om der saken welke vander Zijl brugge te doen maken ende anders dat hier na volget. Item so hebben die voirs. heemr. geconsenteert dat die scout van Leyderdorp openbair sel kondigen in die kercke dat hi omme gaen sal op die zijlen ende hoelen gelegen vander Does brugge totten ambocht van Coudekerck toe ende den inganc ende wtganc vanden water te bewaren [50v] tot des lants oirbair, ende dat beschouwen mit twe heemr. off merr op die boete van ii sc., ende elke heemr. vi d.

 

Location, Folio
OAR12, 040r-d
type : Consent	date : 1444-03-04	record : # 183
[014] Item des gelijcx is geconsenteert den scout van Coudekerck te bescouwen van Claes van Leewen totter kercken toe van Coudekerck, ende dit is beyde durende totten heemr. wederseggen.

 

Location, Folio
OAR12, 040r-e
type : Consent	date : 1444-05-05	record : # 192
[015] Item so ist geconsenteert den scout van Coudekerck dat hi scouwen mach die Nye weteringe ende sluyse gelegen inden ambocht van Coudekerck inden Lagen Wairt op een boet van ii sc., durende tot des heemr. wederseggen.

 

Location, Folio
OAR12, 040r-f
type : Consent	date : 1445-04-05	record : # 196
[016] Item upten vijften dach in aprille waren vergadert tot Leyden heer Gerijt van Poelgeest, heer Willem van Alcmade, Jan vander Boechorst ende Boudijn van Zwieten ende deden doe alsulke punten als hier na gescreven staen. Item so wort geconsenteert Jacop van Rijswijck dat hi mochte doen maken twee steenen hoofde in Voirscotenre weteringe jegen sijn zaet die hi aldair leggende heeft an die brugge die hi dair gesteken heeft, durende totter heemr. wederseggen.

 

Location, Folio
OAR12, 040v-a
type : Consent	date : 1445-05-04	record : # 204
[017] Item so wort doe geconsenteert die van Catwijck ende van Oestgeest, Riedwijc ende Nyerkerc te scouwen als die van Zoeterwoude geconsenteert wort int jair van xxxv, ende dat salmen vinden int blat van xxiii.

 

Location, Folio
OAR12, 040v-b
type : Consent	date : 1445-10-05	record : # 207
[018] Item anno xlv op die Bamis scouwe hebben geweest heer Gerijt van Poelgeest, Jan vander Boechorst, Boudijn van Zwieten ende IJsbrant van Scoten. Item so hebben die heemr geconsenteert die van Zoeterwoude ende die van Benthusen een quakelbrugge te maken in hoir ambocht ghelijc die van outs plach te wesen, durende tot des heemr. wederseggen.

 

Location, Folio
OAR12, 040v-c
type : Consent	date : 1445-10-05	record : # 208
[019] Item so hebben die heemr. geconsenteert die vanden Scoot dat si mit vier bueren scouwen mogen dat si mit viven pleghen te doen, want si niet meer lude inwonende hebben, totter tijt toe dat si meer lude hebben.

 

Location, Folio
OAR12, 040v-d
type : Consent	date : 1445-10-05	record : # 209
[020] Item so hebben die hiemr. geconsenteert die broeders inden Wairdt buten Leijden een brugge te maken over den nijen Rijn behoudelic dat sij die hoefden also setten sullen dat men den Rijn dair mede niet en sal nauwen.

 

Location, Folio
OAR12, 040v-e
type : Consent	date : 1446-02-22	record : # 211
[021] Petri ad cathedram anno xlvi. Item waren vergadert tot Hairlem op die scouwe heren Gerijt van Poelgeest, heren Willem van Alcmade, Jan vander Boechorst, IJsbrant van Scoten ende Simon Verderic. Item op die tijt hebn die heemraet geconsenteert dat die scout mitten heemrade vander Scoot scouwen sullen dat sullen sij doen roepen op eenre sonnendach in drie die naeste kerken sonder meer wete dair off te doen also die lantgenoten wijt geseten sijn, dit sel gedueren toter hoech hiemraet wederseggen.

 

Location, Folio
OAR12, 040v-f
type : Consent	date : 1446-05-03	record : # 215
[022] Item op die mey scouwe waren Poelgeest, Alcmaide, Zijl, Boechorst, Zweten ende Scoten ende hebn gekuert ende gedaen als hier na bescreven staet. Item so is geconsenteert den luden wt den Kage bij horen vervolch dat sij sullen mogen scouwen gelijcken die vanden ambocht van Alcmaide consenteert is, duerende tot des heemraids wederzeggen.

 

Location, Folio
OAR12, 040v-g
type : Consent	date : 1446-05-03	record : # 216
[023] Item die van heren Jacobs woude is geconsenteert dat sij totten minsten coste tot des lants oirbair scouwen mogen als dat nutste wesen sall.

 

Location, Folio
OAR12, 041r-a
type : Consent	date : 1446-06-28	record : # 219
[024] Item op die Does scouwe waren vergadert alle die heemrade ende worden gedaen al sulken punten als hier na gescreven staen. Item wort op die tijt die van Hazerswoude geconsenteert dat sij een sluystgijn wt breken souden dat gelegen was bijder oost kade anden Rijndijck inden selven ambbocht, overmits dattet den ambocht voirsc. niet nut en was.

 

Location, Folio
OAR12, 041r-b
type : Consent	date : 1421-1434	record : # 238
[025] Item Pieter Dever consenteert een brugge te leggen doer den wech voir sijn boomgairt ende to houden datse die scout mitten hiemr. prijset, durende tot onsen wederseggen.

 

Location, Folio
OAR12, 041r-c
type : Consent	date : 1421-1434	record : # 240
[026] Item geconsenteert die van Waddijnxveen te nemen die naeste airde tot minster scade haren heerwech mede te maken vande bruggen ter kerken toe, durende tot onsen weder seggen.

 

Location, Folio
OAR12, 041r-d
type : Consent	date : 1447-00-00	record : # 242
[027] Item geconsenteert Gelbairt Pieters z. ii bruggen to leggen doir elken wech, een om aldair doer te varen, ende dit sal geduren tot onsen weder seggen.

 

Location, Folio
OAR12, 041r-e
type : Consent	date : 1432-00-00	record : # 247
[028] Item geconsenteert Heinrix Jacops z. een brugge te leggen doer den wech tot Rensaterwoude durende tot onsen weder seggen.

 

Location, Folio
OAR12, 041r-f
type : Consent	date : 1432-00-00	record : # 248
[029] Item geconsenteert die van Coudekerck een draybooem te maken op Heymans brugge, durende tot onsen weder seggen.

 

Location, Folio
OAR12, 041r-g
type : Consent	date : 1432-00-00	record : # 249
[030] Item die van Leyderdorp geconsenteert den wech bij Leyden te hogen bijden lagen hiemraet.

 

Location, Folio
OAR12, 041r-h
type : Consent	date : 1434-06-29	record : # 259
[030] Item geconsenteert up die Does scouwe dat dat Hielige geest lant van Rensaterwoude morgen gelt gelden sall durende te weder seggen.

 

Location, Folio
OAR12, 041r-i
type : Consent	date : 1434-00-00	record : # 261
[032] Item geconsenteert die van Zoetermeer dat sij manen zullen alle die dair gelant sijn, ende betalen sij niet, soe sullen die ghene die dat morgen gelt gaderen panden an dat beste land vanden helen weer soe sij van outs gelegen hebben, durende tot onsen weder seggen.

 

Location, Folio
OAR12, 041v-a
type : Consent	date : 1434-00-00	record : # 263
[030] Item geconsenteert die van Zoeterwoude een nuwe wech te maken bij sinter Nyclais huysken.

 

Location, Folio
OAR12, 041v-b
type : Consent	date : 1434-02-03	record : # 264
[034] Item geconsetneert Florijs van Bosschuysen een wateringe in Puelgen.

 

Location, Folio
OAR12, 041v-c
type : Consent	date : 1435-00-00	record : # 277
[035] Anno xxxv. Item geconsetneert die van Vresecoop een waterscip xii voet wijdt, wijder of nauwer bijden scout ende hiemr., ende beginnen an Billerdammer wech streckende an Rijnzaterwoude in Heinric Jacops zoons weteringe, ende is geschiet bij Heinric Jacops z. consent. Ende dese wateringe sullen maken die scout mit zijnen hiemr. bij haren eede dair in hoefslagen.

 

Location, Folio
OAR12, 041v-d
type : Consent	date : 1434-06-29	record : # 281
[036] Item geconsenteert die hiemr. van Alcmade dat sij scouwen sullen up des ambochts cost, te weten elcx hiemr. xii penninge die scout ii sc. des dages, durende tot onsen wederseggen, ende geschiede anno xxxiiii tsinte Jans scouwe.

 

Location, Folio
OAR12, 041v-e
type : Consent	date : 1448-02-27	record : # 290
[037] Item inden ambocht van Zuytwijck leyt een wateringe geheten de Kersch dair twie hoofde in leggen die gekuert sijn up x voet van malcander geheten die Brug laen, soe hebben de dijckgrave ende hiemrade tot deser tijt geconsenteert ten versoeke Wouter Jacops zoon als ambocht bewairre van Zuytdijck dat sij dese hoofde op achte voet van malcander steken mogen, durende tot der hiemrade weder seggen.

 

Location, Folio
OAR12, 041v-f
type : Consent	date : 1448-02-27	record : # 291
[038] Item so hebben die dijckgrave ende hiemrade de scout van Zoeterwoude geconsenteert te scouwen den nuwe weteringe ende den ommedijck vanden nuwen wege tot Meestgen Vrancken z. toe geliken hij scouwet binnen sijnen ambocht van andere wege ende wateringe ende tot zulken boeten, durende tot weder seggen.

 

Location, Folio
OAR12, 042r-a
type : Consent	date : 1448-05-06	record : # 293
[039] Anno xlviii den vi den dach van meye waren vergadert tot Hairlem Poelgeest, Alcmade, Boechorst, Jan van Poelgeest, Schoten ende Simon Vrederick. Item op die zelve tijt wort geconsenteert heer Lodewijc van Montfoirde in sijn heerlicheit van Hazaertswoude alsoe hem in voirleden tijden een wateringe geconsenteert is geweest mit eenre bruggen doir Haessaertswoude wech, soe ist dat heer Lodewijc voirs. ter sijnen versoeke ende sijnen buyren op desen tijt gegont is dat hij dien voirs. wateringe verrechten sal mogen so him dien best dienen mach tot ordinancie vanden hiemrade van Rijnlant, behoudeliken dat alle die ghene die inde voirs. wateringe wateren mitten lande van Rijnlant gelden sullen.

 

Location, Folio
OAR12, 042r-b
type : Consent	date : 1448-05-06	record : # 299
[040] Item die scout van Woude is geconsenteert dat hij scouwen sal in alre manieren als de scout van Alcmade gegont is ende dair of is him een copie gegeven soe dat in onsen boeck gescreven staet.

 

Location, Folio
OAR12, 042r-c
type : Consent	date : 1448-05-06	record : # 302
[041] Item is de scout van Zoeterwoude geconsenteert dat hij all beesten die bijden Rijndijck gaen bij zijn soon mach doen scutten in alre manieren of hijt selve dede, tot sulken boeten als dair toe staen.

 

Location, Folio
OAR12, 042r-d
type : Consent	date : 1448-10-08	record : # 308
[042] Item so hebben die hiemraden opten voirsc. tijt geconsenteert in Gelreswoude an die noortsijde anden Broeck wech een nuwe wateringe ix voete wijt streckende vanden Kerck laen ten eynde wt mit eenen dam te houden voir dat Segwaerts water, ende dat sel die scout van Zoeterwoude scouwen mitten heemr. van Gelreswoude gelijc ander wege ende wateringe.

 

Location, Folio
OAR12, 042r-e
type : Consent	date : 1449-02-25	record : # 309
[043] Up sinte Pieters scouwe waren vergadert tot Sparendam Poelgeest, Alcmade, Scoten, Poelgeest ende Symon Vrederic. Item op die zelve tijt wort geconsenteert Jacob Claes z. een huell an die zuytsyde van Zoeterwoude kerck voir sijn land ende doir den wech in sijns selfs banwerc, ende die te houden buten ymants cost.

 

Location, Folio
OAR12, 042v-a
type : Consent	date : 1449-05-06	record : # 310
[044] Anno xlix op die meye scouwe waren vergadert Poelgeest, Alcmade, Zijll, Scoten, Poelgeest. Item op die zelve tijt wort die van Oestgeest geconsenteert dat sij binnen den voirsc. ambocht een scouwe ordineren sullen bijden scout ende hiemraet als dat behoirt, dat sij alle wege ende wateringe scouwen sullen in manieren dat alle hoirlude of gemeent van hoiren wegen werckwijsinge doen sullen als dat behoirt, op sulke boete als die croess hiemraden nair ouder gewoente plegen te scouwe, te weten elke boete op ii sc.

 

Location, Folio
OAR12, 042v-b
type : Consent	date : 1449-05-29	record : # 313
[045] Item up die selve tijt wort Huge van Berge geconsenteert een huel te leggen over Boevesloot, duerende tot des hiemr. wederseggen.

 

Location, Folio
OAR12, 042v-c
type : Consent	date : 1449-06-05	record : # 314
[046] Anno xlix upten vijften dach van junio waren upten dijck Ysbrant van Scoten ende Jan van Poelgeest ende hebben ---------- als hier nae bescreven staen. Eerst soe wort Heynric Jans soen geconsenteert dat hij tusschen Florijs wail ende Mychiels wael een zijl duer den Hogen dijck leggen sal ende houden buten yemants cost, duerende tot des hiemr. wederseggen.

 

Location, Folio
OAR12, 042v-d
type : Consent	date : 1449-11-18	record : # 320
[047] Item up die selve tijt wort geconsenteert dat de scout van Zegwairt scouwen sel die nuwe wateringen die die van Rotterdamme gemaect hebben in die Zegwairt, streckende vanden lantsceydinge tot Eggerts lant toe up sulke boeten als men binnenslants dair gewoenlic is.

 

Location, Folio
OAR12, 042v-e
type : Consent	date : 1400-06-24	record : # 027
[048] Anno domini m cccc xxiiii up sinte Jans dach nativitas hebben die hyemr. Gerijt Willems z. van Leyden geconsenteert een muyr te leggen up die wateringe ruym genoech van horen banwerck dair hij up tymmeren mach.

 

Location, Folio
OAR12, 043r-a
type : Consent	date : 1450-05-05	record : # 395
[049] Item so wort optie tijt geconcenteert dat Martin Dircx z. sulc plaetwerc als die van Leydemuden ende die vander Aer pleecht toe te behoren maken ende voirt an houden sal buiten den voirn. dorpen enich oncost te eysschen.

 

Location, Folio
OAR12, 043r-b
type : Consent	date : 1450-06-30	record : # 396
[050] Item so wort geconcenteert den baelju van Oestgeest, totter geenre behoef die tusschen den Hofdijck ende den Poel gelant sijn, een wateringe doir den Hofbroec beginnende vander sluse die doir den Hofdijck gaet tot inden Poel duerende tot des heemr. wederseggen, met voirwaerden dat alle die geen die hoefslach hebben opten Hofdijc horen hoefslach ontfangen sullen in die nuwe wateringe.

 

Location, Folio
OAR12, 043r-c
type : Consent	date : 1450-06-30	record : # 397
[051] Item also die scout van Oestgeest gewoenlic is te scouwen inder selven ambocht opten meyen dach twelke een ongewoenliken dach is mits der hoechtijt so hebben die hiemr. den voirn. scout geconcenteert dat hij voirt an scouwen sal des woensdages naden meye dach, duerende tot der heemr. wederseggen.

 

Location, Folio
OAR12, 043r-d
type : Consent	date : 1450-06-30	record : # 398
[052] Item so is dien van Reynsburch ende dien van Oestgeest geconcenteert dat sij alle hoer geest gebruken sullen in allen manieren als die van Lis, Voirhout, Sassenem hoir geesten gebruken, duerende tot des heemr. wederseggen.

 

Location, Folio
OAR12, 043r-e
type : Consent	date : 1450-06-30	record : # 399
[053] Item also die jonfrouwe van Egmonde geconcenteert was optie meye scouwe lestleden dat sij twee ackeren goets lants soude laten leggen onverdolven totter tijt toe dat sulke renten als hair bijden hiemr. over gevonden worden voir hoir lant dat sij insteect den oncost an te verhalen, so is hair nv geconcenteert dat die twee acker lants in dier voir waerden sullen bliven leggen tot die meye scoue toe naestcomende ten onderpande als voirsc. staet.

 

Location, Folio
OAR12, 043v-a
type : Consent	date : 1450-06-30	record : # 400
[054] Wij scout ende heemr. ende ambocht bewaerres ende gemeen bueren van Benthuysen bidden ende begeren anden hogen heemr. van Rijnlant also als ons heren Jan van Heemstede heer van Benthusen hier voirtijts gegeven ende gegonnet heeft een notwech ende een slot ander noortsijde vanden wege mit vrienscappen ende mit overdracht den gemenen bueren van Benthusen die dair in geland sijn ende want nv dit lant verganclic is ende bijden delven vergaet ende sommighe personen die dair in gelant sijn ['ende want nu dit lant verganclick is' is crossed out] onwillich dair in vallen overmits hoir baet ende die wech te verdelven doir den ambocht van Benthusen ende die gemeen bueren die dair gaern woenstal houden souden in vercort souden wesen, so bidden wij v hoge heemraet voirsc. minlic ende vriendlick dat voirt an te houden ende te scouwen na des lants oirbair ende een scouwe dair op te leggen mit een sloot besiden an die nortsijde vanden wege achte voete wijt metten wech.

 

Location, Folio
OAR12, 043v-b
type : Consent	date : 1450-06-30	record : # 401
[055] Item so begeren ende bidden wij scout, heemraet ende ambocht bewaerres ende gemeen bueren van Benthusen also als onse maeyvelt ende maeylant van Benthusen lange is wel vijfhondert roeden ende geen waterganck en heeft daert sijn water wt losen mach ende seer snode ende vergancliken wort alsinen sien mach, so begeren ende bidden wij v hoge ende wel geboren heemraet van Rijnlant overmits slants oerbaer voirsc. ons gonnen ende kueren wilt een sloot vanden Hemsloot overdwers dat lant totten kercwech toe daert den scout mitten heemr. van Benthusen bij rade van v hoge heemrade van Rijnlant dat goet dochte. Item dit is dien van Benthusen geconsenteert in allen manieren als voirn. punten voirsc. begripen, duerende totter hiemr. wederseggen.

 

Location, Folio
OAR12, 044r-a; OAR12, 048v-e-049r
type : Consent	date : 1410-00-00	record : # 016
[056] [105] Int jair van xiiiic ende tien geconsenteerde die hoge hiemr. van Rijnlant den lagen hiemr. van Alphen an die oestside vander Goude dat sij self coiren mogen so wie op hem sprake roerende van haren scouwe of dat hoiren eet te na ginge verboerde xx lb. also dicke [15v] als sijt deden, x lb. tot mijns heren behoef, v lb. den scout, ende ellic hiemrader een lb., des sijt betugen moechten met twe vander hiemraden van Alphen voirs. dat dat verbuert waer. Voirt die boeten die tot iii lb. stonden die sullen staen tot xlii sc., des sel hebben die scout mitten vijf hiemr. van Alphen voirgenoemt ende die scout sel hebben also veel als twe hiemraders. Ende dese voirgenoemde boeten mogen sij self berechten met horen scout ende hiemr. voirs. Dit sel dueren tot den hogen hiemr. wederseggen.

 

Location, Folio
OAR12, 044r-b
type : Consent	date : 1447-06-27	record : # 231
[057] Item op die tijt wort geconsenteert die van Benthuzen dat sij voirt an scouwen souden mit vijff heemr in alre manieren als sij te voren plagen mit seven hiemr.

 

Location, Folio
OAR12, 044r-c
type : Consent	date : 1447-06-27	record : # 232
[058] Item op die selve tijt wort geconsenteert dat die van Soetermeer voirt an scouwen sullen in alre manieren als die van Soeterwoude doen.

 

Location, Folio
OAR12, 044r-d
type : Consent	date : 1447-06-27	record : # 233
[059] Item op die selve tijt wort geconsenteert dien van Alphen den lagen dijck doirgaens te scouwen mit eenre souwe alst hem nutte dunct.

 

Location, Folio
OAR12, 044r-e
type : Consent	date : 1447-06-27	record : # 234
[060] Item op die selve tijt wort geconsenteert dien van Sassenhem den dijck te verhoeffslagen die neffen der muelen an die oostzijde ter meren wairt opstrecket.

 

Location, Folio
OAR12, 044r-f
type : Consent	date : 1435-00-00	record : # 278
[061] Item Heinric Jacops z. geconsenteert dat hij in Leymuden in Vriesecoop ende in Reynsterwoude scouwen ende werck heren sal mit vijf hiemr, gelijc hij pleget mit zeven, ende mit twie scouwe, die eerst op des ambochts cost ende voirt na costumen.

 

Location, Folio
OAR12, 044v-a
type : Consent	date : 1448-05-06	record : # 300
[062] Item also die scout van Zoeterwoude de Zwiet ende de Swette pleget te scouwen des dijnxdages na sinte Jans dach, so is geconsenteert dat hij dien voirs. scouwe altijt verleggen mach tot des vrydages na, durende te wederseggen.

 

Location, Folio
OAR12, 044v-b
type : Consent	date : 1448-07-04	record : # 306
[063] Item op die selve tijt wort geconsenteert Ysebrant de Cuyper mit sijn mede gesellen een ganck brugge over de Vliet bij Dirck Ysacx te maken.

 

Location, Folio
OAR12, 044v-c
type : Consent	date : 1451-03-02	record : # 402
[064] Item soe worden die van Wilsveen geconsenteert een huel te maken duer den wech duerende tot der heemrader weder seggen. Gedaen anno een ende vijftich up sinte Pieters scouwe.

 

Location, Folio
OAR12, 044v-d
type : Consent	date : 1451-03-02	record : # 403
[065] Item up die selve tijt vervolchte Aelbert die Viselair anden heemraden om een wech te verleggen after beghijnhoff tot Noortich ende wort Pieter van Bossch bevolen te besien ende den gemeenen bueren dair om te spreken oft daer yement mede ghehindert waer ende want alle die voirsc. bueren wel daer mede te vreden zijn als ons Pieter bij ghebrocht heeft, soe hebben wi den selven Aelbert dat geconsenteert den wech te verleggen buten die bueren cost duerende totter heemrader wederseggen. Gedaen anno li up sinte Pieters scouwe.

 

Location, Folio
OAR12, 044v-e
type : Consent	date : 1451-05-04	record : # 404
[066] Item so is den gemenen ambochten bewaerres van Rijnland geconsenteert dat zij tot allen tiden als zij gebrec hebben an den genen dair sij enigerhande ongelt off gaderen van des ambochts weghen ende dat niet crigen en connen dat zij dan elcx miten horen den genen daer hem ghebrect an valt voir den heemraet dagen sullen mogen ter naester scouwe om te verstaen wair om dat elc zijn ommegesette gelt niet en betaelde om dan dair in te doen alst van rechts wegen behoren sal. Gedaen anno li optie meye scouwe.

 

Location, Folio
OAR12, 044v-f
type : Consent	date : 1451-06-29	record : # 405
[067] Item soe is die van Wassenair geconsenteert Mees Willem Heinric z. een brugge consenteren die gelegen is in die Ruge laen dat hi dien van steen maken en sal ende houden xxxvi jaer lanc buten der bueren coste daer hi die selve laen den voirn. tijt voir gebruiken sal ende dueren tenden den bueren de voirn. brugge geheel ende goet leveren sal ende die laen tot des ambochts behoeff. Gedaen anno een ende vijftich up sinte Jans scouwe.

 

Location, Folio
OAR12, 045r-a
type : Consent	date : 1451-10-05	record : # 406
[068] Item so wort geconsenteert die ghene die ande Maerndijck gelant sijn ende ande wateringe after Endegeest dat zij die voirsc. Maerndijck ende wateringe voirsc. bij horen scout verhoefslagen mogen. Gedaen anno li op die bamis scouwe.

 

Location, Folio
OAR12, 045r-b
type : Consent	date : 1451-10-05	record : # 407
[069] Item op die selve tijt wort geconsenteert Dirc Willem Aelbrecht z. in Stompic dat hi een hueltgen sal mogen leggen inden wech voir zijn [huis] al te weder zeggen.

 

Location, Folio
OAR12, 045r-c
type : Consent	date : 1452-05-02	record : # 408
[070] Item so quamen enige vanden bueren van Koudekerck geseten inden Lagen waert ende gaven te kennen dat zij zeer belast waren van dat binnen water ende hopen hem wel te behelpen mit huelen duer den Lagenwaertscen dijck om veel waters tot veel tiden te losen. So is den voirn. bueren geconsenteert dat alle die geen dies behoeftich sijn huelen maken mogen doer den voirn. dijck in manieren hier nae volgende, te weten wie een huel maken wil, die salse maken van vier goede eyken plancken ende ghesloten mit goede eyken kasinen ende sal int voorst eynde een goede scot duer maken diemen up ende toe doen mach tot allen tiden als des noot wesen sal. Dit sal gedueren tot de heemraets weder seggen. Gedaen anno 52 meye scouwe.

 

Location, Folio
OAR12, 045r-d
type : Consent	date : 1452-05-02	record : # 409
Item int jair m cccc ende lii uptie meye scouwe worde geconsenteert dese nae gescreven ses punten. [071] Item so worden die van Oestgeest geconsenteert tot hoirre kerken behoeff dat zij hoir drie lijtwege tot der selver kerken behoeff iairlicx te weiden, duerende tot der heemrader wederseggen.

 

Location, Folio
OAR12, 045r-e
type : Consent	date : 1452-05-02	record : # 410
[072] Item soe zijn die van Noortich ende Noortigerhout geconsenteert dat voort an die scout mitten heemraet ende ambochts bewaerres tot allen tiden alst hem noot duncken sal scouwen mogen ende die te gebieden alst noot is buten vragen vanden bueren. Optie meye schouwe lii.

 

Location, Folio
OAR12, 045r-f
type : Consent	date : 1452-05-02	record : # 411
[073] Item up die selve tijt wort die van Noortich geconsenteert enen vervallen wech after dat dorp van Noortich voir an te scouwen gelijc ander lijtwege.

 

Location, Folio
OAR12, 045r-g-045v
type : Consent	date : 1452-05-02	record : # 412
[074] Item zo zijn die van Nuwerkerck ende die van Rietwijc geconsenteert dat [45v] sij horen wech verleggen mogen tot oirbair vanden lande bij rade der geenre die bij horen eede dair to geset sullen worden.

 

Location, Folio
OAR12, 045v-a
type : Consent	date : 1452-05-02	record : # 413
[075] Item uptie selve tijt wort geconsenteert die van Sparenwoude enen draeyboem te setten upten wech after Pieter Hilbrants zs. huys, duerende tot der heemrader wederseggen.

 

Location, Folio
OAR12, 045v-b
type : Consent	date : 1452-05-02	record : # 414
[076] Item so is Vechter Clais z. geonsenteert dat hij enen notwech duer delven mach gelegen by Soeterwouder kerck ende sal den wech houden dat die buer daer geen gebrec an en hebben, dit sal gedueren tot der heemrader wederseggen ende sal die wech iairlicx mogen up doen alst hem noot is duerende gelijc voirsc. staet [in another hand is added: 'Anno lii meye schouwe.'].

 

Location, Folio
OAR12, 045v-c
type : Consent	date : 1452-10-02	record : # 415
[077] Item also die gemeen bueren van Soeterwoude ende Leyderdorp overdragen sijn een brugge over den Rijn nevens den kerck te maken ende dair off consent vanden heemraden begeert hebben so is hem luyden geconsenteert dat sij die brugge sullen mogen maken in manieren nae volgende te weten dat sij die brugge maken sullen soe hoech als die Zijl brugge is ende soe breet als den gemeen bueren nut ende oerbaer duncken sel, dit sel gedueren tot der heemraden weder seggen, anno xiiii c lii bamis scouwe.

 

Location, Folio
OAR12, 045v-d
type : Consent	date : 1452-10-02	record : # 416
[078] Item zoe wort den bueren van Koudekerck geconsenteert een hoefslach te maken upten Hogenwaertschen dijck, anno xiiii c lii.

 

Location, Folio
OAR12, 045v-e
type : Consent	date : 1452-10-02	record : # 417
[079] Item zoe worde die vander Aer geconsenteert een zijdwijn die gelegen is inden ambocht vanden Langer aer dat sij die selve sijdwijn hoirre kerken vander Aer geven mogen, anno xiiii c lii bamis.

 

Location, Folio
OAR12, 045v-f
type : Consent	date : 1452-10-10	record : # 418
[080] Item zoe is Baertout van Assendelff geconsenteert sijn wech voer sijn doer te verleggen tot Hillegom, dit sel gedueren tot der heemrader wederseggen, anno xiiii c lii.

 

Location, Folio
OAR12, 045v-g
type : Consent	date : 1444-02-24	record : # 181
[081] Item so begeerden die van Riedwijck ende Nyewerkerck datmen hem verdragen woude van horen penninck gelde twe hondert morgen om dat si groot verlies hebben van horen lande van die meeren, dair hebben die heemr op antwoirde also sise altijt willich vonden in des lants saken, so hebben si him wt goedertierenheit op dese tijt dat penninck gelt van twe hondert morgen verdragen ende niet van rechts werren noch in enige providicien [penindicien] van onsen nacomelingen in toe comende tijden.

 

Location, Folio
OAR12, 046r-a
type : Consent	date : 1445-05-04	record : # 203
[082] Item so hadden die van Coudekerck een eynde cadijcx anden afterdijck inden ambocht van Leyderdorp dat si vercoft hebben Dirc vander Does bij consente vanden hogen heemr., behouden altijt dat die van Coudekerck bliven sullen verbonden den ambochte van Leyderdorp dat ende kade na hoirre kuer te houden ende te maken als van outs geweest heeft, ende des so sullen si weder sulke voirwairde nemen van Dirc vander Does dat dat ambocht van Coudekerck dair van tot ewigen dagen sonder scade blive.

 

Location, Folio
OAR12, 046r-c
type : Consent	date : 1448-05-06	record : # 294
[084] Item op die zelve tijt wort vanden hiemrade den gemeen ambocht bewares te kennen gegeven hoe dat de hiemrade van Schielant bewindt genomen hebben ende nemen willen binnen den banne van Zegwairt, dat binnen de merken van Rijnlant ende van Sparendam is, ende zeker dage mitten hiemrade van Scielant dair of gehouden sijn geweest dat die hiemrade van Rijnlant de voirs. heemrade van Scielant van horen rechten gaven [garen?] doechdeliken onderwijst hadden dat sij of laten wouden, twelc die voirs. hiemraede van Schielant niet doen en hebben willen, soe hebben dair omme de hiemrade van Rijnlant, om den oirbair ende trechte tgemeens lants te bescudden, voir genomen de hiemrade van Schielant mit rechte te wederstaen ende de ambocht bewairres gepresenteert hoiren morgen bij hem inden costen te leggen dair de ambocht bewairres de hiemraden of bedancten ende sijn overdragen ende dunct goet dat men de hiemrade van Schielant ende andere wederbare ten coste vanden gemenen lande mitten utersten recht tot datsij tlant van Rijnllant in horen rechte laten.

 

Location, Folio
OAR12, 046v-a
type : Consent	date : 1448-05-06	record : # 301
[085] Item overmits datmen den sloot die langes den Zantwech leyt tusschen Leyden ende des Waddiinge niet wel varen en mach om sant dair op te brengen tot zulken tijden alst noot is so is den scout van Soeterwoude geconsenteert dat hij hij rad van sijnen hiemrade die sloot kueren ende scouwen sall tot tijden alst hem dunct datter best dienen ende oirbarilicxte wesen sall.

 

Location, Folio
OAR12, 046v-b; OAR12, 049r-b
type : Consent	date : 1443-03-13	record : # 161
[086] [107] Anno xliii tot Lisse des dages na Gregorij heemr. Poelgeest, Alcmade, Boechorst, Paeds ende Scoten. Item so die van Stompwijc waterscup begeren biden ommedijck dairt nutte is ten sij dat Boudwijn van Zweten bewijsen conde dat hij dair bij bescadicht wair, so souden die heemr. anders hem dair in voirsien ende dat bewijs sal hij doen voir paeschen naest comende of het sal gemaect worden gelijc voirs. is, durende tot onsen wederseggen.

 

Location, Folio
OAR12, 046v-c; OAR12, 099v-a
type : Consent	date : 1443-03-13	record : # 162
[087] [024] Anno xliii tot Lisse des dages na Gregorij heemr. Poelgeest, Alcmade, Boechorst, Paeds ende Scoten. Item so sal die metinge die is ende men doen sal tot Hasertswoude bliven ende van wairde wesen ende dat bescreven in drien boeken, dair die heemraet dat een of hebben sullen ende die stede van Leyden dat andere ende dat ambocht dat derde. Des sullen si niet meer mit ons noch in an den ongelde buten haren ambocht gelden dan sij tot hair to gedaen hebben, durende tot onsen wederseggen. Ende so wes dair meer morgen sijn dat sel gelden gelijc alle ander hoir lant hem te baten te comen binnen horen ambocht van horen oncost. Ende si sullen alle jair hair rekeninge brengen den heemraet van allen cost als penninc gelt, slusen, plaetwerc, dijc, dam, watergange ende wege gelijc men ander wege doet.

 

Location, Folio
OAR12, 046v-d-047r
type : Consent	date : 1444-10-10	record : # 194
[088] Item opten tienden dach van october anno xiiii c xliiii so hebben geconsenteert ende gemachticht die hoge heemr. van Rijnlant den scout ende heemr. vanden ambochte van Leyderdorp alsulke punten hier an gescreven. Item datmen die Nye weteringe scouwen sal alsinen andere weteringe doer. Item datmen die kade die sluysen ende hecken dicht hout. Item datmen die kade ende den afterwech verhuer ende datmen dat gelt geve den genen die dair toe gerecht sijn ende hoir lant of gedolven is elke nader grote van sijne lande bij goet duncken ende redelicheit des scouten ende heemr. voirs. Item datmen die ambocht bewarers van jair te jare kiesen ende setten sal biden scout, heemr. ende meeste rijcdom vanden ambocht aldair ende altoes enen vanden ouden ambocht bewairers dat naeste jaer wt dair an te bliven ende den ambocht ende lantgenoten altijt goede rekeninge te doen alst behoirt ende gewoenlic is. Item die dat voirs. staet hebben die hoge heemr. van Rijnlant [added in the bottom margin: 'als heren Gerijt van Poelgeest, heren Gerijt van Zijl, heer Willem van Alcmade, Jan vander Boechorst ende Boudijn van Zwieten'] upten dach ende int jaer voirs. geordineert ende geconsenteert te houden up sulke boeten als inden ambocht voirs. recht ende gewoenlic is, durende tot horen wederseggen.

 

Location, Folio
OAR12, 047r-a
type : Consent	date : 1448-07-04	record : # 305
[089] Upten vierden dach van julio waren vergadert tot Leyden Alcmade, Poelgeest, Boechorst ende Simon Vrederic. Item op die zelve tijt wort geconsenteert Dirck Aelbrechts soen wonende tStompwick dat hij een hueltgen sel mogen leggen vore sijn doire doir den wech.

 

Location, Folio
OAR12, 047r-b
type : Consent	date : 1452-10-17	record : # 419
[090] Item soe wort geconsenteert Dirc Humans soen ende Olyvier Aernts z. een scouwe van eenre wateringe in Segwaert beginnende van Eggert Vranken z. lant tot Meeus Pieters soon lant toe die Middel vaert ende ander Hoefwech totter Cromme toe streckende in die ander vaert. Dit sel gedueren tot des heemraden wederseggen.

 

Location, Folio
OAR12, 047r-c
type : Consent	date : 1452-10-24	record : # 420
[091] Alsoe voirtijts Dirc Humans z. ende Olivier Aernts z. een scouwe geconsenteert was in Zegwaert in een vaert inden vene die onlancx leden ingesteken sijn daer enige personen tegens spreken menende dat die voirsc. vaert niet oirbairlic en soude wesen daer die voirsc. Dirc ende Olivier weder op gegeven hebben van xviii personen lant geneten in den voirsc. venen van welke xviii personen de xiiii personen de voirsc. kuere begeren als zij seggen etc. daer up is hem noch geconsenteert bij also datmen bevint ande personen gelijc zij in hoir cedule gescreven hebben datmen hem dan de scouwe ind vaert aftervolgen sall.

 

Location, Folio
OAR12, 047v-a
type : Consent	date : 1453-05-08	record : # 421
[092] Die dijcgrave ende heemrade hebben den scout van Zegwaert bevolen te scouwen den eynde waterings daer Dirc Huymans z. ende Olivier Aernts soon om gevolcht hebben, duerende tot horen wederseggen.

 

Location, Folio
OAR12, 047v-b
type : Consent	date : 1452-10-24	record : # 422
[093] Item is den scout ende bueren van Wassenaer geconsenteert een hoefslach van eenre wateringe beginnende vanden Papewech omtrent hondert roeden oistwaerts.

 

Location, Folio
OAR12, 047v-c
type : Consent	date : 1453-01-15	record : # 423
[094] Item soe wort den scout van Aelsmaer geconsenteert dat hij den wech van Aelsmaer scouwen sal mogen, des gelijcx is hem oic geconsenteert dat hi den wech mede scouwen sal die binnen vier jaren niet beheert en heeft geweest, dit consent sal dueren tot der heemrader wederseggen.

 

Location, Folio
OAR12, 047v-d
type : Consent	date : 1453-05-08	record : # 424
[095] Item soe wort geconsenteert die scout van Catwijck te mogen verhoefslagen Valkenburger broeck wech mits dat hi te kennen gaff datter die gemeen lantgenoten hoir begeren was etc.

 

Location, Folio
OAR12, 047v-e
type : Consent	date : 1453-05-08	record : # 425
[096] Item also voirtijts een wateringe geheten Dirc Doeden wateringe tot der scouwe gelegen heeft ende de selve scouwe verdragen wort ende dair omme alle die gene die de voirsc. wateringe plegen te houden voirt an gehouden souden wesen die ander twe wateringe te houden lant lants gelijc. Soe is vorder geconsenteert den scout enen hoefslach upte twe wateringen te leggen behoudelic datmen de gene die Dirc Doeden wateringe plegen te houden int gelden vanden tween wateringen goedertieren wesen sal.

 

Location, Folio
OAR12, 047v-f-048r
type : Consent	date : 1453-05-08	record : # 426
[097] Item op die selve tijt wort geconsenteert dat die van Hazertswoude wege ende wateringe sullen scouwen in manieren hier nae verclaert, te weten dat die scout mitten heemraet in Hazertswoude sullen condigen openbaer inde kerck van Hazertswoude up ene heiligen dach hoeneer [48r] zij scouwen willen achte off xiiii dagen te voren te minsten viii dagen ende dat tot wat tiden die scout ende scepenen gelieft ende oirbaer sal duncken ende dan sullen zij scouwen mit eenre scouwe doer ende wes werck sij te ban scouwen sel die scout off hebben ii sc. ende elc hiemraet een sc., ende dan sel die scout dat werc besteden om den minsten cost ende den eygen een weet laten hebben off hi dat werc selff maken wil off dat die bestedinge voirt gaen sal ende dan sal die scout mit den scepenen comen over viii dagen dair nae ende besien off dat werck gemaect is ende ist dan niet gemaict soe sel die scout dan hebben iv sc. ende elc. hiemraet ii sc. ende van viii dagen tot viii dagen telken die helft meer.

 

Location, Folio
OAR12, 048r-a
type : Consent	date : 1453-10-17	record : # 427
[098] Den scout ende lage heemr. van Alphen is geconsenteert also hair kaden inden winter dicwijl over lopen dat zij tot allen tiden als dat geschiet den genen die den eygendom vanden lande toebehoirt van dier kade een wete doen sullen om binnen dwers nacht die kade dicht te maken ende off die kade niet dicht gemaict en wort soe sullen zij dat bestaden dicht te maken ende dien coste weder in winnen nae dijckrecht.

 

Location, Folio
OAR12, 048r-b
type : Consent	date : 1454-02-26	record : # 428
[099] Item soe hebben die hyemraden geconsenteert Gerijt Hugen z. dat hij in seven mergen lants die hij leggende heeft binnen die vaert cant van Benthuysen mach delven een sloot alsoe wijt datter een aelman in ende wt mach ende daer over leggen ende maken een huele up sijn selffs cost ende die houden up sijns selfs cost, duerende tot hueren wederseggen.

 

Location, Folio
OAR12, 048r-c
type : Consent	date : 1454-02-26	record : # 429
[100] Den scout van Soeterwoude is geconsenteert dat hij mit sijnen heemrade een scouwe leggen mach opten herewech tusschen der Weypoort ende die kerc van Soeterwoude, duerende tot des hyemr. wederseggen up sulke boeten alsmen ander wegen scouwet in Zoeterwoude.

 

Location, Folio
OAR12, 048v-a
type : Consent	date : 1454-03-12	record : # 430
[101] Item upten xii en dach van maert anno liiii hebben heer Willem van Alcmade ende Jan van Poelgeest geconsenteert vander hyemr. wegen van Rijnlant wt vervolge Jan Pieters soen als ambochts bewaerre van Wassenaer, Claes Colfmaker, Jacop Martijn z. ende Dirc Clais Clais z.z. als inwonende van Wassenaer een huel te maken over den wech in Druyts wael van steen vier voet wijt ten minsten, duerende tot der heemrad. weder seggen.

 

Location, Folio
OAR12, 048v-b
type : Consent	date : 1455-07-01	record : # 431
[102] Item den dijcgrave ende hogen hiemraet van Rijnlant hebben gheconsenteert die van Benthuysen dat sij die Notsloot ende in die twie nuwe wateringe die liggen over dwars in Benthuysen hoofden in mogen steken seven voeten wijt drivens waters om ende aldair hoir koeyen over te breggen ende hoir hoey over te voeren, duerende tot des hiemraets weder seggen, gedaen op sinte Jans scouwe anno vijfendevijftich.

 

Location, Folio
OAR12, 048v-c
type : Consent	date : 1454-10-08	record : # 432
[103] Item den hiemraet van Rijnlant heeft geconsenteert den broederen van sinte Iheroming buten Leyden dat sij een brugge sullen mogen doen maken ende liggen inden ouden wech soe dat sij doir den voirsc. wech in hoir cloester sullen mogen varen wtten Rijn behoudelijc dat sij twater after scutten ende dicht houden sullen dat niement dair gij beschadicht en worde ende des sullen sij die brugge ander half roede breet maken.

 

Location, Folio
OAR12, 048v-d
type : Consent	date : 1454-10-15	record : # 433
[104] Item die hiemraders hebben dien van Hazertswoude geconsenteert dat sij hecken sullen mogen setten op die Slingerkade duerende tot horen wederseggen.

 

Location, Folio
OAR12, 049r-c
type : Consent	date : 1455-05-06	record : # 434
[108] Item die dijcgrave ende hiemraet van Rijnlant hebben geconsenteert alle den genen die op die Zegwairt wonen ende gelant sijn an die dwars nywe vairt ende hoir lant dair over gelegen sayen willen dat sij een brugge elc mogen leggen over die voirsc. vairte neffens hoir lant om hoir lenten ende bouwe te doen, te weten van sinte Servaes dach beghinnende duerende xiiii dage lanck ende weder inden oest xiiii dage [49v] beghinnende sinte Louwerijs dage, duerende tot des hiemraders wederseggen, gedaen optie meye scouwe anno lv.

 

Location, Folio
OAR12, 049v-a
type : Consent	date : 1455-05-06	record : # 435
[109] Item die dijcgrave ende hyemraders hebben geconsenteert dien van Zegwairt dat sij v of vi man setten mogen om te gaderen sulc gelt als sij ommegeslagen hebben om te betalen dat sij den hyemraders van Schielant beleggen sullen van hoir delvinghe, gedaen optie meye scouwe anno lv.

 

Location, Folio
OAR12, 049v-b
type : Consent	date : 1455-05-06	record : # 436
[110] Item op die selve tijt wort Pieter van Bossche van wegen der bueren van Hazertswoude geconsenteert een cade te verliggen van Gelreswoude brugge tot die weteringe ende die cade te leggen langes die weteringe ende sal die scout scouwen als hi andere wege ende weteringe doet, gedaen optie mey scouwe anno lv.

 

Location, Folio
OAR12, 049v-c
type : Consent	date : 1455-10-07	record : # 437
[111] Item noch wort hem [bueren van Hazertswoude] geconsenteert een weteringe ix voeten wijt streckende van Mees Vrancken z. tot Jan Aelwijns z. toe langes der ommedijc doir te gaen ende die selve wateringe sal die scout scouwen gelijc hij andere wateringe doet, gedaen optie meye scoute anno lv.

 

Location, Folio
OAR12, 049v-d
type : Consent	date : 1455-10-07	record : # 438
[112] Item op die selve tijt wort Willem van Leeuwen geconsenteert twee hoofde te steken after sijn woninge tot Voerscoten in die weteringhe tot des hiemraets weder seggen, gedaen optie bamis scouwe anno lv.

 

Location, Folio
OAR12, 049v-e
type : Consent	date : 1455-10-07	record : # 439
[113] Item op die selve tijt wort geconsenteert Martijn Evers z. ende Wouter Hughen z. mit horen mede gesellen dat zij een huele sullen moghen liggen doir Stompicker wech inden hof veen des sullen zij weder poten binnen sulken tiden ende also veel als sij nae wtwijsinge der kueren sculdich is te doen, gedaen optie bamis scouwe anno lv.

 

Location, Folio
OAR12, 049v-f
type : Consent	date : 1455-10-07	record : # 440
[114] Item also een brugge gelegen int ambocht van Zoetermeer inder Broec wech soe is geconsenteert ende geordiniert dattet gemeen ambocht die voirsc. brugge voirt aen houden sullen, gedaen optie bamis scouwe anno lv.

 

Location, Folio
OAR12, 049v-g-050r
type : Consent	date : 1456-06-29	record : # 441
[115] Item op die selve tijt wort geconsenteert die van Zegwairt dat zij een eynde van een ban weteringe gelegen vanden Rucken veen bijder [50r] wech souden laten wesen ende laten varen ende maken die boven biden nywen wech gelijc als zij after an die Zegwairt leyt, gedaen sinte Jans scouwe anno lvi.

 

Go to Folio's ...
000	010	020	030	040	050	061	070	080	090	100	110	120	130

 

Author	Publication	Home
William H. TeBrake Maine, USA, June 2006	Rijnland OAR11, OAR12, OAR13	www.oudleiden.nl